A. Vınokýrov: «Meni kóre almaıtyndar kóp»
ASTANA. 9 qarasha. QazAqparat - Aleksandr Vınokýrov óziniń aınalasyndaǵy bolyp jatqan keleńsiz jaıtqa oraı málimdeme jasady.
Bul jaıynda «Alaman» sport agenttigi habarlap otyr.
«Bul eskirgen taqyryp. Men ózimniń kináli emestigimdi burynda aıtqanmyn. Meniń alyp qosarym joq buǵan. Bul neden týyndap otyr? Meniń basshylyq qyzmetke kelgenimdi bireýler kóre almaıdy. Shetelde ǵana emes, ózimizdiń aramyzda da. Bireýge meniń Ekspony nasıhattap júrgenim unamaı júrýi de múmkin. Maǵan sol birkúndik jeńis ne kerek? Qarap kórińiz! Mende qansha jeńis? Kolobnevte qansha jeńis? Qaıta ol jeńis Kolobnevke qajet-aq. Al men ol jarysta óz kúshimmen jeńgen edim. Qazir Belgııada meniń advokattarym júr. Olar bul jumystarmen aınalysyp jatyr», - dedi Olımpıada chempıony.
Esterińizge sala keteıik, 24.kz Aleksandr Vınokýrov «jeńisti satyp aldy» dep aıyptalyp jatqandyǵyn habarlaǵan bolatyn. Italııanyń quqyq qorǵaýshylary Olımpıada chempıony Aleksandr Vınokýrovty «para berdi» dep aıyptap otyr. Olardyń pikirinshe, 2010 jylǵy «Lej-Baston-Lej» velojarysyndaǵy qazaqstandyq shabandozdyń jeńisi aldyn ala kelisilgen. Olımpıada chempıony Aleksandr Vınokýrov tóńireginde daý shyqty. Italııanyń Padýı qalasynyń quqyq qorǵaý qyzmetkerleri qazaqstandyq sańlaqtyń 2010 jylǵy «Lej-Baston-Lej» birkúndik velojarystaǵy jeńisi satyp alyndy degen pikirde. Jergilikti prokýratýra Vınokýrovtyń reseılik sportshy Aleksandr Kolobnevpen 150 myń eýroǵa kelisip, Shveıtsarııa banki arqyly ýáde etilgen aqshany aýdarǵany týraly naqty dáıekterdi alǵa tartyp otyr. Qazir tergeý júrgizilip jatyr. Bul dodada márege Vınokýrov birinshi, al Kolobnev ekinshi bolyp kelgen edi.
