A. Vınokýrov Frantsııanyń «Chrono des Nations» jarysyna qatysýǵa nıetti
ASTANA. 10 qazan. QazAqparat /Jasulan Amanbaıuly/ - «Pro Team Astana» komandasynyń veloshabandozy Aleksandr Vınokýrov «Chrono des Nations» jarysyna qatysatyndyǵyn málim etti.
Sportshynyń Týr de Franstyń 9-shy kezeńinde qulap, aýyr jaraqat alǵanyn QazAqparat buǵan deıin habarlaǵan bolatyn. Toptyń basynda kele jatqan «Astana» komandasynyń kóshbasshysy eńiske túsý kezinde joldyń shetine shyǵyp ketip, qulaǵan edi. Vınokýrov shuǵyl Orıık gospıtaline jetkizilip, onda rentgenge túsiriledi. Onyń oń jaq jambas súıegi synǵany anyqtalady. 10 shilde kúni keshke Parıjdegi «La Pitié Salpetriere» gospıtaline jetkizilip, operatsııa jasalady.
Sońǵy aptalarda Vınokýrov Alpi jáne Italııanyń soltústik joldarynda ataqty chempıon Eddı Merks jáne Fılıpp Jılbermen birge jattyǵý jasap júr jáne ol óziniń tez qalypqa túsip kele jatqandyǵyna kóz jetkizgen.
«Men sońǵy jattyǵýlarymda jarysqa qaıtyp oralý jóninde kóp oılandym. Men jolda ózimdi jaqsy sezinemin, biraq densaýlyǵyma qaýip tóndirgim kelmeıdi. Men jekeleı syndaǵy jarystarǵa qatysýdan bastaýdy sheshtim, sebebi onda klassıkalyq toptyq jarystarǵa qaraǵanda qulaý qaýpi áldeqaıda tómen. Sondyqtan men Lombardıı týrynda emes, Chrono des Nations jarysyna qatysýdy sheshtim. Bul meniń 2009 jyly jeńgen jarysym edi. Alaıda men bıyl ol jarysta jeńýge maqsat qoımaıtynym anyq. Men jarys rıtmin saqtaý jáne sońǵy aılarda óte úlken qoldaý kórsetken jankúıerler úshin oralamyn», - deıdi A. Vınokýrov «Astana» klýbynyń resmı saıtynda jazǵan málimdemesinde.
Sonymen qazaqstandyq veloshabandoz Frantsııanyń Harberesinde bolatyn jarystyń trassasyna kelesi jeksenbide 16.30 saǵatta shyǵady.
