A.Vınokýrov: «Belgııalyq prokýratýranyń jemqorlyqqa qatysty aıyptary oıdan shyǵarylǵan»
ASTANA. QazAqparat - Ataqty qazaqstandyq veloshabandoz Aleksandr Vınokýrov 2010 jyly «Lej - Baston - Lej» birkúndiginiń qorytyndylary qoldan jasaldy jáne jemqorlyqqa boı aldyrdy degen Belgııa prokýratýrasynyń aıyptaryn negizsiz jáne sportshy atyna kir keltirýdiń qadamdary dep otyr.
«Ol jaıynda pikir aıtýdyń ózi artyq, men taǵy qaıtalap aıtamyn, jarysta ádil jeńdim. Bul meniń atym arqyly alaıaqtyq jasaýdyń amaly dep sanaımyn. Prokýrorda aıqyn dálel joq bolǵan soń ol ony BAQ arqyly jalpaq jurtqa jaıyp saldy. Bul durys emes qoı. Tipti bul kim úshin kerek ekenin de túsinbeımin», - dedi ol búgin tilshilerge bergen suhbatynda.
Eske sala keteıik, Belgııa prokýratýrasy Aleksandr Vınokýrov pen reseılik sportshy Aleksandr Kolobnevke jemqorlyq boıynsha aıyp taqty. Sudinfo.be basylymynyń aqparaty boıynsha, A.Vınokýrov 2010 jyly «Lej - Baston - Lej» atty belgııalyq jarysta jeńiske jetý úshin A.Kolobnevke 150 myń eýro tólegen kórinedi. Sot otyrysy birneshe aılardan keıin ótedi dep josparlanýda.
