A.Vınokýrov «Astanany» óz qolyna alatyndyǵyn málimdedi
ASTANA. 1 qyrkúıek. QazAqparat - Ýkraınada ótken baspasóz máslıhatynda Qazaqstannyń veloshabandozy, London Olımpıadasynyń chempıony Aleksandr Vınokýrov «Astana» komandasyn ózi basqaratyndyǵyn málimdedi.
«Ýkrınform» aqparattyq agenttigi habarlaǵandaı, bolashaq qyzmeti týraly jýrnalısterdiń saýalyna jaýap bergen A.Vınokýrov: «Aldaǵy ýaqytta josparym bylaı bolyp tur. Qazirgi kezde Qazaqstannyń velosport federatsııasymen kelissózder júrgizip jatyrmyz. «Astana» komandasyn men basqaratyn sııaqtymyn. Komandanyń veloshabandozy qyzmetinen menedjer laýazymyna aýysatyn bolamyn. Bolashaq chempıondardy tárbıeleımiz. Qazaqstanǵa barǵannan keıin qyrkúıektiń basynda Prezıdenttiń ózi meni resmı túrde tanystyrýy tıis», - dedi. Olımpıada chempıony atap kórsetkendeı, búginde «Astana» úshin bıik maqsat-mindetter qoıylyp otyr. Osy oraıda ol kelesi jyly komandanyń Djıro velojarysynda jeńiske jetýi tıis ekendigin erekshe atap ótti.
Aıta keteıik, qazirgi kezde «Astana» komandasynyń menedjeri qyzmetin Djýzeppe Martınellı atqarady.
