A.Vınokýrov: «Astana» velokomandasyndaǵy legıonerler qazaq sportshylarynyń qaryshtaýyna sep beredi
ASTANA. QazAqparat - «Astana Pro Team» velokomandasy halyqaralyq arenada Qazaqstan namysyn ary qaraı qorǵaı beretin bolady. Bul týraly komandanyń bas menedjeri Aleksandr Vınokýrov málim etti.
«Komanda «Týr de Fransta» óz jumysyn 100 paıyzǵa atqaryp shyqty. Bizdiń bas demeýshimiz «Samuryq Qazyna» qoryna úlken alǵysymyzdy aıtamyz. Mádenıet jáne sport mınıstrligimizdiń qoldaýy da toqtaǵan emes. Sonymen qatar «Astana» kásibı prezıdenttik sport klýbynyń prezıdenti bolyp taǵaıyndalǵan Vladımır Smırnovty quttyqtaımyn. Ol sport menedjmentinde úlken tájirıbege ıe jáne onyń kelýimen kóptegen ister jasalady dep senemin. Biz óz kezeginde Qazaqstan namysyn halyqaralyq arenada kótere beretin bolamyz», - dep atap ótti ol.
Sonymen birge A.Vınokýrov shetel legıonerleri men qazaqstandyq jas sportshylardyń aralasa qyzmet etýi qazaqstandyq velosporttyń damý deńgeıine tikeleı áser beredi dep otyr.
«Komandada 10 shaqty qazaqstandyq veloshabandozdar bar. Olar Kamyshev, Lýtsenko, Fomınyh jáne basqalary. Olardyń áleýeti joǵary. Olar Vınchentso Nıbalı men Fabıý Arý syndy álemdik deńgeıdegi sportshylarmen qatar jumys isteýde. Bul olardyń jáne jalpy otandyq velosporttyń damýyna yqpal etedi. Men de kezinde jas bolǵanymda T-Mobile komandasynda ıAn Ýlrıhtyń janynda júrip shyńdaldym», - dedi A.Vınokýrov.
