A. Turlybaıdyń isi boıynsha apellıatsııalyq ınstantsııa sheshimi jyldyń aıaǵyna deıin belgili bolady - advokat

2014 jylǵy 9 naýryzda Gýanchjoý áýejaıynda iri kólemde esirtki zatyn tasymaldady degen kúdikpen ustalǵan 1994 jyly týylǵan Aqjarqyn Turlybaıǵa qatysty sot úderisi júrip jatyr.

Turlybaıǵa qatysty qylmystyq úderis pen onyń odan arǵy taǵdyry kúlli qazaqstandyq qoǵamnyń nazaryna ilikti. Aqjarqyn isiniń zańdyq aspektileri men onyń qytaı tergeý oqshaýlaǵyshynda turý jaǵdaıy týraly qazaqstandyq jýrnalısterge boıjetkenniń advokaty, Rainmaker zańgerlik kompanııasynyń ókili Sıao Chjande jaýap berdi.

- Qytaı zańnamasynda esirtki zattaryn taratqany, tasymaldaǵany nemese saqtaǵany úshin qandaı jaza kózdelgen?

- QHR Gýandýn provıntsııasynyń joǵary ınstantsııadaǵy halyq sotynyń sheshimine sáıkes A. Turlybaı QHR Qylmystyq kodeksiniń 347-baby (Esirtki zattar kontrabandasy, ony ótkizý, tasymaldaý jáne daıyndaý) boıynsha ómir boıy bas bostandyǵynan aıyrý jazasyna kesildi.

- Aqjarqyn Turlybaıdyń qylmystyq isi boıynsha jaǵdaı ne bolyp jatyr? Onyń qorǵaýshylary apellıatsııaǵa ótinish berdi me, nátıjeleri qandaı ?

- Ustalǵan A. Turlybaı týraly aqparat túsken sátten bastap QHR eki «Rainmaker» jáne «Haitian Qingcheng» zańgerlik fırmasynyń ókilderi QHR-daǵy QR elshiligi konsýldyq bólim qyzmetkerlerimen birlesip onyń quqyqtary men múddelerin qorǵaý boıynsha sharalar ótkizýde. Biz konsýldarmen birge A. Turlybaımen jáne Gýanchjoý quqyq qorǵaý organdarynyń ókilderimen birneshe ret kezdestik.

Bizge belgili bolǵandaı, 2015 jylǵy 3 sáýirde Gýanchjoý q. ortasha ınstantsııadaǵy halyqtyq sotta esirtki zattaryn tasymaldaǵany úshin QR azamatshasy kúdikti Aqjarqyn Turlybaıǵa qatysty tyńdaý ótkizilgen. 2015 jylǵy 15 maýsymda ortasha ınstantsııadaǵy halyq sotynyń sheshimimen ol ómir boıy bas bostandyǵynan aıyrý jazasyna kesildi.

QHR «Azamattyq is júrgizý kodeksiniń» erejesine sáıkes apellıatsııaǵa úkimdi jarııalaǵan kúnnen bastap 10 kún ishinde berýine bolady. 2015 jylǵy 22 maýsymda Aqjarqynnyń advokattary Gýandýn provıntsııasy Birinshi satydaǵy joǵarǵy halyqtyq sotqa apellıatsııa berdi.

Gýandýn provıntsııasy Birinshi satydaǵy joǵarǵy halyqtyq soty keńsesiniń aqparatyna sáıkes, 2015 jylǵy 15 tamyzda Aqjarqyn isi apellıatsııalyq óndiriske qabyldandy.

Qorǵaý tarapy, óz kezeginde, sýdıalarmen kezdesý múmkindigin qarastyrý jáne sotty ashyq rejimde júrgizý ótinishimen qoldaýhat jiberdi. Osy is boıynsha sottyń sheshim qabyldaýy týraly aqparat kútip otyrmyz.

QHR zańnamasyna sáıkes ómir boıy bas bostandyǵynan aıyrý jazasyna kesilgen adam minez-qulqy jaqsy bolyp, eki jyl ishinde kolonııa ákimshiligi tarapynan talaparyz bolmaǵan jaǵdaıda, jazasyn óteý merzimin qysqartý týraly qoldaýhat berýge quqyǵy bar.

- 2015 jylǵy 30 qyrkúıekte sottalǵan tulǵalardy qaıtarý týraly QR QHR arasyndaǵy shart kúshine endi. Osy sharttyń aıasynda Aqjarqyndy Qazaqstanǵa ekstradıtsııalaý múmkindigi bar ma?

- «Sottalǵan tulǵalardy qaıtarý týraly Qazaqstan Respýblıkasy men Qytaı Halyq Respýblıkasy arasyndaǵy sharttyń» 4-babyna sáıkes azamatsha A. Turlybaıdy qytaı tarapynyń kelisimimen ǵana qaıtarýǵa bolady. Jaýapty organdar Qazaqstan Respýblıkasynyń Bas prokýratýrasy men Qytaı Halyq Respýblıkasynyń Ádilet mınıstrligi. Apellıatsııa boıynsha sheshim qabyldanǵanǵa deıin sottalýshy QR azamatshasy A. Turlybaıdy elge qaıtarý múmkin emes.

- Aqjarqyn Turlybaıdyń jalpy jaǵdaıy qandaı?

- Aqjarqynmen kezdesý barysynda densaýlyǵy men ony ustaý jaǵdaıyna shaǵymdanbady. Ol fızıkalyq ta, psıhologııalyq jaǵynan da ózin jaqsy sezinedi. Kúnine úsh ret tamaqtanady, jan-jaqtan qysym kórsetýshiler joq. Tergeý oqshaýlaǵyshynyń basshysy Aqjarqynǵa jaqsy qaraıdy. Kamerada odan basqa úsh adam (Malaızııa, Indonezııa, Vetnam azamatshalary) bar. Túzeý mekemesine kelgen ýaqyttan bastap Aqjarqyn qytaı tilin úırene bastady. Qazir onymen qytaı tilinde erkin sóılesemiz, bir-birimizdi túsinemiz. Áńgimelesý barysynda ol birneshe ret «Men eseıdim» dedi, ıaǵnı ol óz isine qatysty sabyrlyq tanytýda.

- Apellıatsııalyq saty sot sheshimi qashan belgili bolady?

- Bıyl.

- Suhbat bergenińizge rahmet!