A. Tájaıaqov pen D.Qadyrbaevty Qazaqstanǵa ekstradıtsııalaý úshin Amerıkanyń kelisimi kerek - I.Merkel
Bul týraly «Qazaqstan Respýblıkasy - Eýropalyq Odaq» taqyrybyndaǵy ádil sot pen quqyqtyq tártip jónindegi kishi komıtettiń 13-shi otyrysy aıasynda jýrnalısterdiń suraǵyna jaýap bere otyryp, QR Bas prokýrorynyń orynbasary Iogan Merkel málim etti.
Onyń aıtýynsha, AQSh pen Qazaqstan arasyndaǵy sottalǵan adamdardy berý týraly Konventsııa bul azamattardyń jazasyn QR aýmaǵynda ótýine negiz bola alady.
«Iá, Konventsııa kúshine enedi, qujat kúshine engen sátte biz bireýiniń týystary jasaǵan ótinishti berýge daıyn edik, biraq, ekinshi azamattyń týystary osyndaı ótinish jazsa, ekeýin elge qaıtarý úshin tıisti sharalardyń bárin qoldanýǵa daıynbyz»,-dedi I.Merkel.
Bas prokýrordyń orynbasary atap ótkendeı, bul máseledegi mindetti shart - sottalǵan adamdardyń ózi ótinish jazý kerek.
«Eger sottalǵan azamattardan aryz túspese, biz múlde áreket qoldana almaımyz. Mindetti túrde olardyń aryzdary kerek. Eger sottalýshynyń múmkindigi shekteýli bolsa nemese aqyl-esinde kemistik bolsa, onda zańdy ókili osyndaı ótinish jasaý kerek», - deıdi ol.
Al, jalpy, Tájaıaqov pen Qadyrbaevty ekstradıtsııalaý qanshalyqty múmkin degen suraqqa I.Merkel: «Bul is óte kúrdeli ekenin bilesizder ǵoı. Birinshiden, olar ótinish jazýy kerek, ekinshiden, eń basty másele - Amerıka tarapynyń kelisimi kerek. Eger qandaı da bir sottalýshyny berý AQSh-tyń ulttyq qaýipsizdigine zııan keltiredi dep tapsa, olar sottalýshyny bermeıdi. Bizdiń el de osy qaǵıdany ustanady», - dep túsindirdi ol.
Esterińizge sala keteıik, AQSh-tyń Federaldyq sot alqasy Qazaqstan azamattary Dıas Qadyrbaev pen Azamat Tájaıaqovty AQSh-ta bolǵan terorlyq áreketti tergeýge kedergi keltirý maqsatymen aldyn ala kelisim, ekinshisi - tergeýge kedergi jasaý, qylmyskerge kómek kórsetý jáne arańdatýshylyq baptary boıynsha sottaǵan bolatyn.
