A. Tájaıaqov pen D. Qadyrbaevqa sot úkimin shyǵarý keıinge qaldyryldy
ASTANA. QazAqparat - 2013 jyly sáýir aıynda Bostonda oryn alǵan terrorlyq aktini tergeýge kedergi keltirýge qatysty aıypty dep tanylǵan qazaqstandyqtar Azamat Tájaıaqov pen Dıas Qadyrbaevtyń sot úkimin shyǵarý keıinge qaldyryldy, dep habarlaıdy RIA Novostı.
Tájaıaqovtyń qorǵaýshysy Arkadıı Býhtyń aıtýynsha, sot úkimi jarııalanatyn kúni áli belgilenbedi. Sondaı-aq advokat AQSh-tyń Joǵarǵy soty qazirde basqa is boıynsha - Florıdanyń balyqshysy Djon Eıtstiń isi boıynsha úkim shyǵaryp jatqanyn aıtty. Al ol is birneshe aıǵa sozylýy múmkin. Osydan keıin ǵana baryp Qadyrbaev pen Tájaıaqovtyń úkimi shyǵarylady.
Aıta keteıik, 2007 jyly Eıtsti Meksıka shyǵanaǵynda jaǵalaýdaǵy kúzet ustaǵan bolatyn. Onyń kemesinen kóp balyqtar, onyń ishinde aýlaýǵa tyıym salynǵan balyqtar tabylǵan. Eıtske portqa baryp balyqtardy esepteý kerektigin aıtqan, alaıda ol jolda tyıym salynǵan balyqtardyń barlyǵyn teńizge tastap jiberedi. Osydan keıin balyqshynyń ústinen aıǵaqty joıdy degen aıyp taǵylyp, sot ony 30 kún abaqtyǵa qamaý jáne 50 myń dollar aıyppul tóleý sheshimin shyǵarǵan. Alaıda keıin AQSh Joǵarǵy sotynda bul is boıynsha daý týǵan. AQSh-tyń saýda palatasy zańnamadaǵy aıǵaqty joıý boıynsha bap qujattardy, qandaı da bir aqparattardy joıýdy kózdeıtinin, al balyqty joıý bul bap boıynsha qarastyrylmaıtynyn aıtqan. Sondyqtan da Joǵarǵy sot zańnamadaǵy bapty qalaı túsindirý kerektigin sheshý kerek. Aıta keteıik, Tájaıaqov pen Qadyrbaev ta dál osy bap boıynsha aıyptalyp otyr.
«Menińshe, Tájaıaqov pen Eıts oqıǵasy bir bap boıynsha qaralýy tıis. Sebebi Tsarnaevtyń sómkesinde eshqandaı da qujattar bolǵan joq. Sondyqtan da sómkeni laqtyryp tastaý aıǵaqty joıý bolyp eseptelmeıdi», - dedi qorǵaýshy Býh.
Federaldy tergeý bıýrosynyń málimetteri boıynsha, Tájaıaqov pen Qadyrbaev dosy Djohar Tsarnaevtyń bólmesinen aıǵaqtardy joımaq bolǵan. Olar laqtyryp tastaǵan sómkeni keıin AQSh-tyń arnaıy qyzmeti tabady. Qazaqstannyń eki azamaty da Tsarnevpen Massachýsets ýnıversıtetinen tanys. Keıin FTB sómkeniń ishinde noýtbýk pen jarylǵysh zattar bolǵanyn aıtqan. Al olar ózderine taǵylǵan aıypty moıyndamady.
