A.Tájaıaqov AQSh túrmesinde 3,5 jyl otyrýǵa kesildi
ASTANA. QazAqparat - AQSh soty 2013 jylǵy Bostondaǵy lańkestik aktisi boıynsha sottalǵan Djohar Tsarnaevtyń dosy qazaqstandyq Azamat Tájaıaqov lańkestik aktini tergeýge kedergi jasaǵany úshin 42 aıǵa túrmege otyrýǵa sottaldy.
Shildede AQSh alqabıler soty Tájaıaqovty lańkestik aktini tergeýge kedergi keltirýge aıypty jáne osy maqsatpen mámilede boldy dep tanydy. Budan buryn aıyptaý qorytyndysymen ol 25 jyl túrmede otyrýy múmkin dep habarlanǵan edi, dep jazady RIA Novostı.
Eske sala keteıik, 2013 jylǵy 15 sáýirde halyqaralyq marafon kezinde Bostonda eki jarylys boldy. Lańkestik aktiniń saldarynan úsh adam qaza boldy, taǵy 260 adam ártúrli jaraqat aldy. Birneshe kún ótkennen keıin ony jasaýǵa kúdiktelgen Tamerlan Tsarnaev polıtseılermen atysta oqqa ushty. Djohar Tsarnaev boı tasalady, biraq ta keıinirek ol ustaldy. Lańkestik akti jasaýdan basqa ol polıtseıdi óltirýge de aıyptaldy.
FBB málimetteri boıynsha, Tájaıaqov pen Qadyrbaev ózderiniń joldastary Djohar Tsarnaevtyń bólmesindegi aıǵaqtardy joıýǵa tyrysty. Olardyń qoqysqa tastaǵan aıǵaqtaryn keıinnen AQSh arnaıy qyzmetiniń qyzmetkerleri tapty. Qazaqstannyń qos azamaty Tsarnaevpen Massachýsetstegi ýnıversıtetten tanys bolatyn. Budan buryn FBB jarylys qondyrǵysyn ázirleý úshin paıdalanylǵan quraldardy bólmeden qalaı shyǵarǵany týraly olardyń aıǵaqtaryn jarııalaǵan bolatyn.
