A.Súleımenov áskerı sambodan ekinshi márte álem chempıony atandy!
ASTANA. QazAqparat - Marokkonyń Kasablanka qalasynda ótip jatqan sambodan álem chempıonatynyń sońǵy kúninde qazaqstandyq Almas Súleımenov jeńimpaz atandy.
Halyqaralyq sambo federatsııasynyń resmı saıtynan tikeleı efırde kórsetkenindeı, áskerı sambodan synǵa túsken Almas 52 keli salmaqta reseılik Amyr Bakrasovpen fınalda kúsh synasty. Kóp uzamaı-aq qazaqstandyq sportshy tamasha ádis qoldanyp, qarsylasyn alyp uryp, birden tórt upaıǵa ıe boldy. Sodan keıin aýyrtý ádisin qoldanyp, merziminen buryn jeńiske jetti. Aıta keteıik, budan bir jyl buryn Japonııanyń Narıta qalasynda osy samboshylar sońǵy básekede beldesken bolatyn. Onda da Almas qarsylasyn tize búktirgen edi. Sóıtip ol áskerı sambodan eki márte qatarynan álem chempıony atanyp otyr.
