A'Studio toby Almatyda úsh kontsert beredi
ASTANA. QazAqparat - Ańyzǵa aınalǵan almatylyq A'Studio toby óziniń 30 jyldyq mereıtoıyna oraı, Almatyda kontsert beredi, dep habarlaıdy QazAqparat tilshisi.
«Mýzyka kúshi» dep atalatyn shoý Respýblıka saraıynda 25-27 sáýir kúnderi ótedi.
«Bul ataýdy tańdaýymyz tegin emes, bizdiń mýzykamyz ǵalamshardyń basty surapyl kúshterin biriktiredi. Kórermender ot, sý, jel jáne kún qýatyn kórip qana qoımaıdy, sezinedi. Munyń barlyǵy ınteraktıvti tehnologııalar men sahna bezendirýdiń jańa tásilderi arqyly júzege asyrylmaq. Artıster jáne bıshilermen birge, kórermender de shoý qatysýshylaryna aınalady. Shyn máninde naǵyz shoý bolǵaly tur. Biz 90-jyldary hıt bolǵan ánder men jańa týyndylarymyzdy aıtamyz. Sonymen birge, ómirden ótip ketken dostarymyz - Batyr, Baǵlan Sádýaqasov jáne Bolat Syzdyqovqa arnalǵan arnaıy bólim bolady», - dedi top jetekshisi Baıǵalı Serkebaev Almatydan ótken baspasóz máslıhatynda.
Sondaı-aq, ol kontserttik alańdy da ádeıi tańdap alǵandaryn jetkizdi.
«Respýblıka saraıymen bizdi kóp nárse baılanystyrady. Erterekte Lenın saraıy atalyp turǵanda, munda stýdııamyz bolǵan. «Araı» toby atanyp júrgenimizde roza Rymbaevamen birge daıyndalatynbyz. Bul ǵımarat bizdiń týǵan úıimizdeı kórinetin. Bul saraıdyń ár buryshyn jatqa bilemiz. Al №303 bólmede Batyr ekeýmiz «Djýlııa» ánin jazǵanbyz, sózin Volodıa Mıkloshevıch jazyp berdi. Sondyqtan, bul oryn biz úshin óte ystyq. Kontsertti qaıda ótkizemiz degende oılanbastan, Respýblıka saraıyn tańdadyq», - dedi B. Serkebaev.
30 jyldyq mereıtoıǵa arnalǵan týrne 10 sáýir kúni Ekaterınbýrg qalasynda bastaldy. Almatydan bólek, bul shoý Máskeý, Sankt-Peterbýrg (Reseı), Tallın (Estonııa), Rezekne (Latvııa) qalalarynda ótedi jáne sońǵy kontsert jeltoqsan aıynda Mınskide (Belarýs) qoıylady.
