A'Studio toby 30 jyldyǵyn EKSPO-da toılaıdy
15-20 tamyz kúnderi EKSPO-2017 halyqaralyq kórmesiniń Kongress-ortalyǵynda A'Studio tobynyń «Mýzyka kúshi» atty mereıtoılyq kontserti ótedi. Top ókilderiniń aıtýynsha, bul kesh burynǵy kontsertterinen ózgeshe.
«Bul top tarıhyndaǵy eń áserli, eń ádemi shara bolmaq, onda alǵash ret gologramma, lazer, ınteraktıvti qondyrǵylar syndy zamanaýı mýltımedııalyq shoý elementterin qosyp otyrmyz. Odan bólek, kórermenderdi vızýaldyq jáne dybystyq arnaıy effektiler, biregeı horeografııalyq qoıylymdar kútip tur. Mundaı shyǵarmashylyq keshte aramyzdan erte ketken top músheleri Batyrhan Shúkenov, Baǵlan Sádýaqasov, Bolat Syzdyqovty eske almaý múmkin emes. Olarǵa arnaıy nómir daıyndadyq» - dedi toptyń negizin qalaýshy, prodıýser Baıǵalı Serkebaev Astanada ótken baspasóz máslıhatynda.
Sonymen birge, tanymal top músheleri óz kontsertterin Qazaqstannan bastaýdyń birneshe sebepteri bar ekenin atap ótti.
«Bizdiń mereıtoılyq shoý otanymyz - Qazaqstannan bastaý alady. Odan keıin Almaty, Sankt-Peterbýrg, Máskeý qalalarynda kontsert ótkizý josparlanǵan. Biraq, bizdiń eń aýqymdy shoý-kontsertimiz EKSPO-da ótedi. Sebebi, mundaǵy tehnıkalyq múmkindikter joǵary, bári jańa, bári zamanaýı. Ózge qalalarda mundaı shoýdy óz deńgeıinde ótkize almaımyz», - dep tolyqtyrdy B.Serkebaev.
Taǵy bir aıta keterligi, kesh uıymdastyrýshylary áleýmettik-qaıyrymdylyq sharasyn da nazardan tys qaldyrmaǵan.
«Biz óz kontsertterimizge jastardyń, jas jetkinshekterdiń kóbirek kelgenin qalaımyz. Olardyń oı-pikiri, talǵamy biz úshin qyzyq. Bizdiń keshimizge kelýge múmkindigi joq jetkinshekterge jáne balalar úıiniń tárbıelenýshilerine kontsertimizdiń 2 myń bıleti arnaıy bólinip otyr», - dep sózin túıindedi B.Serkebaev.
