Á. Smaıylov Statıstıka agenttigi men Aýyl sharýashylyǵy mınıstrliginiń derekteri sáıkes kelmeıtinin moıyndady

ASTANA. QazAqparat - Statıstıka agenttigi men Aýyl sharýashylyǵy mınıstrliginiń derekterinde alshaqtyq bar. Búgin Parlament Májilisindegi Úkimet saǵatynda depýtattar saýalyna jaýap bergen QR Statıstıka agenttiginiń tóraǵasy Álıhan Smaıylov osylaı málim etti.

Jıyn barysynda depýtat Tólegen Ibraev, aýyl sharýashylyǵy salasyndaǵy statıstıkany jetildirý máselesin kótergen edi. «Bizdiń elimizde mal basynyń naqty sany áli kúnge deıin senimsizdik týdyryp kele jatyr. Keıbir kezde Statıstıka agenttigi men Aýyl sharýashylyǵy mınıstrligi arasyndaǵy málimetterde aıyrmashylyq baıqalmaı turmaıdy», - deıdi T. Ibraev. Óz kezeginde, agenttik basshysy Álıhan Smaıylov mal sharýashylyǵy statıstıkasy asa mańyzdy sala ekeni, sondyqtan da agenttiktiń janynan arnaıy vedomstvoaralyq jumys toby qurylǵanyn jetkizdi. Sonymen qatar, agenttik basshysy Aýyl sharýashylyǵy mınıstrliginiń sáıkestendirý bazasyna da toqtalyp, mınıstrlik pen agenttik málimetterinde sáıkessizdik bar ekenin de moıyndady. «Óıtkeni, aýyl sharýashylyǵy mınıstrliginiń sáıkestendirý qorynda jyl boıy oryn alatyn maldyń qozǵalysy tolyǵymen esepke alynbaıdy. Mysaly, sol sáıkestendirý derekqorynda byltyr elimizde týǵan 2,3 mln buzaýdyń tek 24 myńy ǵana enip otyr. Bul problemany mınıstrliktegiler biledi. Qazirgi kúni jergilikti atqarýshy organdarmen sol sáıkestendirý derekqorynyń sapasyn jetildirýge qajetti sharalardy qolǵa aldyq», - dedi agenttik basshysy.