A. Smaıyl: Zııandy aqparattan balalardy zańmen qorǵaý - ulttyq paryz
ASTANA. 18 jeltoqsan. QazAqparat - Erkindik atty qundylyqty túrlishe túsingen, ony qoǵam men halyqtyń ıgiligi turǵysynan emes, óziniń qylmysqa parapar qareketteri úshin paıdalanýshylar aqparat álemin torı bastaǵany ras desek, zııandy aqparattan balalardy zańmen qorǵaý - ulttyq jáne memlekettik paryz.
Búgin Parlament Májilisiniń jalpy otyrysynda palata depýtattary «Balalardy densaýlyǵy men damýyna zııan tıgizetin aqparattan qorǵaý týraly» zań jobasy boıynsha baıandama jasaǵan depýtat Aldan Smaıyl osylaı málim etti.
Depýtattyń aıtýynsha, dál osy máselege Ázirbaıjan, Belarýs, Ýkraına, Latvııa men Estonııa, TMD Parlamenttik Assambleıasy aıryqsha mán berip otyr. Reseı arnaıy zań qabyldaýmen birge, Prezıdent janynan balalardyń quqy jónindegi ókiletti keńes qurdy. Onyń negizgi maqsaty balalardy rýhanı azdyratyn aqparattan qorǵaý.
«Al álemdik tájirıbege súıensek, mundaı zań alǵash ret álem boıynsha Anglııada, sosyn AQSh-ta qabyldanǵan bolatyn. Aıtalyq, Anglııa 1984 jyly beınejazý týraly arnaıy zań qabyldady. Onda erotıkalyq, pornografııalyq jáne t.b. keri sıpattarǵa, balalardy azdyratyn aqparattarǵa tosqaýyl qoıyldy. 1998 jyly AQSh kámeletke tolmaǵandardyń jeke ómirin qorǵaý týraly zań kúshi bar akti qabyldady. Mine, osy aktide alǵash ret balalarǵa arnalǵan veb saıttardy jikteý normasy endi. Budan bólek, árbir balanyń ınternet resýrsy men shekteýi bolady. Sol resýrsy bar balalarǵa aqparattar iriktelip, olarǵa kerek emesteri berilmeıdi. Biz de osyny qarastyryp, tehnıkalyq múmkindik bolsa sondaı jaǵdaıǵa kóshkenimiz durys bolatyn edi», deıdi depýtat.
Onyń aıtýynsha, Japonııa da dál osyndaı zań qabyldap, onda jas sanattaryna qatysty tańbalaý týraly norma engizilgen. «Sonymen birge, ol elde «kontentfıltr» uǵymy engizildi. Bul árbir kompıýterge qosylady jáne árbir ata anaǵa osyny ornatý mindetteledi. Osy tetik arqyly búkil aqparat balalar úshin súzgiden ótip otyrady», dedi A. Smaıyl.
