A. Smaıyl: Farıza - búkil eldiń anasyna aınalǵan úlken tulǵa
«Fákeń elge eń aldymen aqyn retinde tanyldy. Shyn máninde qazaq poezııasynda Mahambetterge tán úlken jiger saqtalyp kelse, qazaq poezııasynda aıbyn paıda bolatyn bolsa, qazaq ádebıetinde qoǵamdaǵy shyndyq óz qalpynda aıtylyp, synalyp jatatyn bolsa, osynyń bárine Farıza Ońǵarsynovanyń yqpaly óte zor», - dep atap ótti ol QazAqparat tilshisine bergen suhbatynda.
Onyń aıtýynsha, F. Ońǵarsynovanyń poezııasy shynshyl, ótkir, jalyndy poezııa. «El Fákeńniń shyǵarmashylyǵyn da syılady, eline degen shyn janashyrlyǵy úshin qaıratkerligin de syılady», - deıdi depýtat.
A. Smaıyldyń oıynsha, dál qazir ómirden ozǵany bar, qazir ómir súrip jatqany bar, ónerdiń aınalasynda júrgen talaı azamattar bar. Solardyń ishinde halqy qaltqysyz qurmettegen Farızadaı adam óte sırek kezdesedi.
«Ol kisini Qazaqstannyń barlyq túkpirinde óziniń baýyryndaı asyǵa kútip otyratyn. Barsa, tóbelerine kóteretin. Fákeńdi qaıratker ǵana emes, óziniń týǵan qyzyndaı kóretin. Al endi Fákeń qoǵamdyq jumysqa, memlekettik qyzmetke, saıası sharalarǵa aralasyp, halyqqa basqa qyrynan tanylǵan kezde, ol kisini el óziniń anasy sııaqty kórdi. Fákeń shyn mánisinde óziniń búkil keremet qasıetterimen eldiń anasyna aınalǵan úlken tulǵa. Mundaı baǵany halyqtyń ózi bergen. Halyq anasy ataný degen ońaı emes! Sondyqtan biz ózimizdiń anamyzdy aqtyq saparǵa shyǵaryp salyp otyrmyz dep tolyq aıta alamyn. Bul úlken qaza», - deıdi halyq qalaýlysy.
Májilismenniń aıtýynsha, F. Ońǵarsynova ómirde óziniń eńbegine oraı qurmet-qoshemetke bólendi. Biraq ol kisiniń qol jetkizgen eń úlken jetistigi - halyqtyń qurmeti bolatyn. «Endigi bizdiń mindetimiz Fákeńniń sol eńbekterin ármen qaraı halyqtyń ıgiligine jarata otyryp, Fákeń aıtqan ósıetterdi, kózi tiri kezinde armandap ketken nárselerdi jalǵastyrýǵa tyrysýymyz kerek», - deıdi A. Smaıyl.
«Fákeń, eń birinshiden, óziniń týǵan tili úshin jany ashyp ótken adam. Osy tildiń tóńireginde kóptegen oılary, óleń-jyrlary bar. Fákeń memlekettik tildi óziniń tuǵyryna qondyryp, ana tilimizdiń mereıi ústem bolǵan shaǵyn bir kórsem dep armandaıtyn. Sol úshin kúresti de. Fákeń «qazaq ádebıetin, mádenıetin álemge tanytýǵa nege asyqpaımyz? Nege bizdi el Gete, Geıne sııaqty oqymaıdy, nege kompozıtorlarymyzdyń dúnıelerin álem halqy bilmeıdi? Biz nege ózimizdiń keremet mádenıetimizdi nasıhattaı almaı júrmiz? Osyǵan memlekettik kózqaras qashan qalyptasady?» dep alańdaıtyn. Biz osyny júzege asyrýymyz kerek», - deıdi depýtat.
Onyń aıtýynsha, Farıza aqynnyń eń qadir tutqan qasıeti - adaldyq. «Ózimen birge júrgen, úzeńgiles bolǵan adamdardyń barlyǵynan adaldyqty talap etetin. Sondyqtan biz Fákeńe adal bola otyryp, ózimizge, elimizge, táýelsizdigimizge, alda turǵan armandarymyzǵa adal bolaıyq degim keledi. Marqumnyń topyraǵy torqa bolsyn!» - dep túıindedi A. Smaıyl.