A.Shoraev: Bıyl jyl sońyna deıin qazaq kúresiniń erejelerine ózgerister engizilmek
ASTANA. QazAqparat - Bıylǵy jyldyń sońyna deıin qazaq kúresiniń erejelerine ózgerister engiziledi. Búgin Astanada Ult kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin ótip jatqan qazaq kúresinen «Qazaqstan Barysy» V respýblıkalyq týrnıri barysynda suhbat bergen Qazaq kúresi federatsııasynyń prezıdenti, ıdeıa avtory Arman Shoraev osylaı málim etti.
«Shyndyǵynda, kez kelgen máseleni jetildirip otyrý kerek. Biz jyl sońyna deıin qazaq kúresiniń erejesine, onyń ádisterine, sonymen qatar tóreshilerdiń baǵa berýine birshama ózgerister engizýdi josparlap otyrmyz. Óıtkeni, keıde osy ádemi sanalatyn qazaqsha kúrestiń barysynda palýandar úshin boz kilemde qıyndaý jaǵdaılar bolyp ketip jatyr. Upaı berý ádisterin ózgertip, kúresti belsendirý maqsatynda túzetý jasaıtyn bolamyz. Bul bizdiń kúrestiń ádemiligin de, jurtshylyq úshin tartymdylyǵyn da arttyra túsedi», - dedi Arman Shoraev.
Onyń aıtýynsha, qazirgi kúni osy qazaqsha kúrestiń basy-qasynda júrgender, ony zerttep júrgen ǵalymdar, tájirıbeli jattyqtyrýshylar bári osyǵan jumylyp jatyr.
Budan bólek, aldaǵy ýaqytta «Álem barysy» týrnırin jyl saıyn emes, eki jylda bir ret ótkizý de josparlanady. Aıta keterligi, qazaq kúresine sońǵy ýaqytta álemdik sportsúıer qaýym qyzyǵýshylyq tanytyp jatyr eken. Máselen, «Álem barysyn» ótkizý týraly usynystar Túrkııa, Reseı, Mońǵolııa tarapynan túsken.
