Á.Shaıahmetovanyń jaǵdaıy ortasha dárejede aýyr - Ersin Júnisov (FOTO)
ASTANA. QazAqparat - Jambyl oblysyndaǵy ushaq apatynan aman qalǵan Ásem Shaıahmetovanyń jaǵdaıy ortasha dárejede aýyr dep baǵalanyp otyr. Bul týraly búgin jýrnalısterge arnalǵan baspasóz máslıhatynda Astanadaǵy №1 qalalyq aýrýhanasy bas dárigeriniń mindetin atqarýshy Ersin Júnisov málim etti.
«Naýqas jansaqtaý bóliminen polıtravma bólimine, ıaǵnı kádimgi palataǵa aýystyryldy. Jaǵdaıy ortasha dárejedegi aýyr deýge bolady. Qosymsha zertteýler júrgizilýde. Aldaǵy eki-úsh kún ishinde Ásemdi aqyryndap tósekten turǵyza bastaımyz. Arnaıy apparattardyń kómegimen qalpyna keltirý sharalaryn jasaımyz. Aldaǵy eki aptada Ásemdi aıaǵynan tik turǵyzyp, eshkimniń kómeginsiz júre alatyndaı bolǵyzýymyz kerek», - dedi E. Júnisov.
Onyń aıtýynsha, naýqas Astanaǵa der kezinde jetkizilgen. Osynda oǵan birqatar aýyr emdeý sharalary júrgizilip, jambas súıekteri men omyrtqalaryna otalar jasalǵan.
"Naýqastyń kóńil-kúıi jaqsy, bizdiń emdeýimizge esh qarsy emes, kerisinshe bizge tolyqtaı senedi. Jazylyp shyqqan soń burynǵy qyzmetine, otbasyna, týystaryna oralýǵa asyǵýda", - deıdi dáriger.
Esterińizge sala keteıik, Ásem Shaıahmetova Jambyl oblysynda apatqa ushyraǵan «An-2» ushaǵynan aman qalǵan jalǵyz adam.
Ushaq 20 qańtar kúni Shatyrkól ken ornynan 25 shaqyrym jerde qulaǵan bolatyn. Ushaq bortynda 7 adam bolǵan, olardyń tórteýi «Qazaqmys korporatsııasy» JShS qyzmetkeri jáne úsheýi ekıpaj músheleri.
