A. Sataevtyń «Anaǵa aparar jol» kartınasynyń treıleri shyqty (VIDEO)
ASTANA. QazAqparat - Jelide Aqan Sataevtyń «Anaǵa aparar jol» («Doroga k materı») kınokartınasynyń treıleri paıda boldy.
Sıýjettik jelisine ulynyń basyna túsken synaqtardan ótýine kómektesetin ana mahabbatynyń kúshi týraly oqıǵa ózek bolǵan. Basty keıipker Іlııas (Ádil Ahmetov) pen anasynyń (Altynaı Nógerbek) arasyndaǵy uly sezim olardyń basyna týǵan barlyq qıyn kúnderdi artqa tastap, qaıta qaýyshýyna sebepshi bolady, dep jazady kinostan.kz.
Fılm 1930 jyldan bastap qazirge deıin aralyqty qamtıdy. Munda halyqtyń basynan ótken qıyn-qystaý kezeńder (ujymdastyrý, jut, soǵys jyldary) basty keıipkerlerdiń turmys-tirshiligi arqyly berilip otyrady. Kartınaǵa jalpy sany 2 myńnan astam adam qatysqan. Negizgi rólderdi Ádil Ahmetov, Altynaı Nógerbek, Arýjan Jazylbekova, Bolat Ábdilmanov, Berik Aıtjanov, Azamat Satybaldy, Erkebulan Daıyrov, Asylbek Boranbaı somdaıdy.
«Anaǵa aparar joldyń» bas prodıýseri - Álııa Nazarbaeva. Al stsenarııdi budan buryn da Sataevpen birge birneshe kartınada jumys istegen Tımýr Jaqsylyqov jazǵan. Týyndyny áýenmen árlegen - kompozıtor Rınat Ǵaısın.
Tarıhı dramanyń túsirilim jumystary Qazaqstanda, Belarýste jáne Ázerbaıjanda júrgizildi.
Eske sala ketelik, «Anaǵa aparar jol» kartınasynyń aldyn ala kórsetilimi «Alǵys aıtý kúni» meıramyna oraı, 2016 jyly 1 naýryzda Elbasy Nursultan Nazarbaevtyń qatysýymen Astana qalasynda ótti.
