A.Sárinjipov Prezıdenttik olımpıada jeńimpazdarymen kezdesti
ASTANA. QazAqparat - Qazaqstan Respýblıkasynyń Ulttyq mýzeıinde Bilim jáne ǵylym mınıstri Aslan Sárinjipov jaratylystaný-matematıka baǵytyndaǵy pánder boınysha Prezıdent olımpıadasynda birinshi oryn alǵan oqýshylarmen kezdesti.
«Oqýda ozat ózderiń sııaqty oqýshylarmen Tuńǵysh Prezıent kúni qarsańynda kezdesip otyrǵanymyz qýantady. Sender ınemen qudyq qazǵandaı bilim alyp, búgin sol bilimniń bir nátıjesin kórip otyrsyńdar. Memleket basshysy Nursultan Nazarbaev jastarǵa erekshe úmit artatynyn jaqsy bilesińder. Búgingi jeńisteriń - úlken jetistikterińniń bir satysy bolsyn», - dedi oqýshylarǵa dıplom men syılyqtar tabys ete otyryp mınıstr A.Sárinjipov.
Jalpy, mınıstrmen kezdesýge elimizdiń óńir-óńirinen 50 úzdik oqýshy jınalǵan. Olardyń biri - Almaty qalasyndaǵy №165 mekteptiń 11-synyp oqýshysy Mıhaıl.
«Rasyn aıtsam, osy jarysqa qatysýǵa ýaqyt tyǵyzdaý boldy. Degenmen, bos ýaqytymnyń barlyǵynda olımpıadaǵa daıyndaldym. Prezıdenttik olımpıada óte joǵary deńgeıde ótti, ıaǵnı, tapsyrmalary aýyr boldy. Sondyqtan, eki myńnan asa oqýshy arasynda matematıka páni boıynsha ekinshi oryn alǵanym jáne jalpy, osy eki myń oqýshynyń arasynan 41 bala júldeli orynǵa jetkenin jaqsy nátıje dep sanaımyn. Bolashaqta bul júldem Qazaqstannyń joǵarǵy oqý oryndarynda bilim alýǵa septigin tıgizedi», - deıdi ol. Mıhaıldiń armany - elimizdiń energetıkalyq áleýetin arttyrýǵa kúsh salý. «Qazaqstan balamaly energııa kózderin damytýda zor bolashaqqa ıe. Meniń armanym - energetıka salasynda qyzmet etý», - deıdi olımpıada júldegeri.
Jalpy, Olımpıada úsh kezeń boıynsha ótken. Aımaqtyq kezeńge el boıynsha 1024 mekteptiń 2040 oqýshysy qatyssa, ekinshi kezeńde 329 bala onlaın rejımde testileýden ótken. Úshinshi, qorytyndy kezeńde 165 bala 2 týr boıynsha matematıka, hımııa, fızıka jáne bıologııa pánderi boıynsha bar bilimderin kórsetken.
Prezıdenttik olımpıada - segiz jyldan beri ótip kele jatqan orta bilim berý salasyndaǵy statýsy bıik jarystardyń biri.
