A.Sárinjipov oblys ákimderine oqýshylardy oqýlyqtarmen qamtymaǵan bilim bóliminiń basshylaryna shara qoldaný týraly hat joldady
ASTANA. QazAqparat - QR Bilim jáne ǵylym mınıstri Aslan Sárinjipov oblys ákimderine oqýlyqtardy ýaqtyly jetkizýdi uıymdastyrmaǵan aýdandyq, qalalyq bilim bóliminiń basshylaryna shara qoldaný týraly usynys hat joldady.
Bul týraly búgin elordada ótken brıfıngte QR Bilim jáne ǵylym mınıstrligi Mektepke deıingi, orta bilim jáne aqparattyq tehnologııalar departamentiniń dırektory Jańyl Jontaeva málim etti.
«Búgingi kúni Bilim jáne ǵylym mınıstriniń hatyn daıyndadyq. Oblys ákimderine oqýlyqtardy ýaqtyly jetkizýdi uıymdastyrmaǵan, Bilim týraly zańnyń oryndalýyna kedergi keltirgen aýdandyq, qalalyq bilim bóliminiń basshylaryna shara qoldaný týraly usynys hat joldandy», - dedi J.Jontaeva.
Onyń atap ótýinshe, QR Bilim týraly zańyna sáıkes, Bilim jáne ǵylym mınıstrliginiń quziretine tek oqýlyqtar men oqý-ádistemelik quraldardyń baǵdarlamasyn ázirleý kiredi. Bekitilgen baǵdarlama jergilikti atqarýshy organdarǵa jiberiledi. Osydan keıin jergilikti atarýshy organdar baspamen kelisimshartqa otyryp, aımaqtardaǵy mektepterdi oqýlyqpen qamtamasyz etýge mindetti. Al oqýlyqtardy satyp alýǵa qajetti qarjy tolyǵymen bólingen.
«Búgingi kúni oblystyq, aýdandyq ákimdikter jergilikti bıýdjetten 8 mıllıard teńgeden astam qarjy aqsha bólip, ol aýdandyq, qalalyq bilim bólimderine berildi», - dedi.
Departament basshysynyń sózine qaraǵanda, aǵymdaǵy jyly 3 pen 10 synyp oqýlyqtary aýystyryldy. Oqýlyqtar 4 jylda 1 ret aýystyrylady.
