A.Sárinjipov: Qazaqstanda taıaý jyldary mektep oqýshylarynyń sany arta bastaıdy
ASTANA. 29 qazan. QazAqparat - Qazaqstanda taıaý jyldary mektep oqýshylarynyń sany arta bastaıdy. Bul týraly búgin 2014-2016 jyldarǵa arnalǵan QR-dyń bilim jáne ǵylym salasy damýynyń basym baǵyttary talqylanǵan Úkimet otyrysynda QR Bilim jáne ǵylym mınıstri Aslan Sárinjipov málim etti.
«Adam kapıtalynyń damýy elimizge keleshekte ǵylymmen tyǵyz ushtasqan ekonomıkany jáne básekege qabilettilikti qalyptastyrýdyń berik irgetasyn qalaýymyzǵa múmkindik beredi. Aldaǵy 3-4 jyldyń ishinde bilim júıesiniń qurylymdyq jáne maǵynalyq turǵydan damyǵan memleketterdiń deńgeıine jetkizý barysynda saıası erkindik jáne resýrstar negizinde aıqyn maqsattar qoıyp, olardy naqty júzege asyrý qajet», - dedi ol.
Bul rette mınıstr bilim berý salasynyń damýyna kedergi keltiretin birqatar júıeli máselelerdi sheshý qajettigin basa aıta kele, elimizdegi oqýshylar sanyna qatysty statıstıkalyq derekterge toqtaldy. «Statıstıka málimetterine sáıkes týý 2020 jylǵa qaraı turaqtalady. Sáıkesinshe, turaqtanǵannan keıin 2025 jylǵa qaraı mektepke deıingi bilim berý jáne bastapqy mektep oqýshylarynyń sany artady. Orta bilimge qatysty aıtar bolsam, onda 11-15 jas aralyǵyndaǵy balalar toby qazirgi ýaqytta tómengi núktede tur jáne taıaý aralyqta belsendi ósim kórsete bastaıdy. Qazirgi ýaqytta kásibı tehnıkalyq jáne joǵary bilim salasynda quldyraý baıqalady. Bul 1990 jyldardaǵy demografııalyq ahýaldyń tómendeýimen baılanysty jaıt. Bul quldyraý shamamen 2020 jylǵa deıin jalǵasady. Al odan keıin joǵary jáne kásibı tehnıkalyq bilim berý salalaryndaǵy balalar sany kúrt óse bastaıdy», - dedi ol.
