A.Sárinjipov: Qazaqstanda 14 pen 24 jas aralyǵyndaǵy 630 myńnan astam jastyń mamandyǵy joq
ASTANA. QazAqparat - Qazaqstanda 14 pen 24 jas aralyǵyndaǵy 630 myńnan astam jastyń mamandyǵy joq. Bul týraly búgin QR Parlamenti Májilisindegi «Tehnıkalyq jáne kásiptik, joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdaý barysynda QR Bilim jáne ǵylym mınıstri Aslan Sárinjipov málim etti.
«Áli kúnge deıin halyqtyń birinshi tehnıkalyq kásip ıgerýine teń qoljemdilik qamtamasyz etilmegen. Búginde tehnıkalyq jáne kásiptik bilim berý júıesinde atalǵan sanattaǵy jastardyń tek 17 paıyzy qamtylǵan»,- dedi ol.
Mınıstrdiń atap ótýinshe, qazirgi ýaqyttyń ózinde 14 pen 24 jas aralyǵyndaǵy 633,2 myń jastyń mamandyǵy joq. Bular jalpy Qazaqstan jastarynyń 20 paıyzyn quraıdy. Olardyń 94 myńy esh jerde jumys istemeıdi.
«Balalar men jasóspirimder sanynyń ósimi de bilim berý júıesindegi júktemeni arttyryp otyr. Problema óńirlik teńgerimsizdik qamtýymen de ulǵaıyp keledi. Ońtústikte 7 myń oryn tapshylyǵy bar. Bul rette soltústik jáne shyǵys óńirlerdegi kolledjderdegi profıtsıt 4 myń oryndy quraıdy», - dedi A.Sárinjipov.
Onyń aıtýynsha, jyl saıyn elimizde 22 myńnan astam mektep túlegi eńbek naryǵyna shyqsa, sonyń teń jartysy - ońtústik óńirlerdiń azamattary.
