A.Sárinjipov: Bilim mınıstrligi Bas prokýratýramen birge jeke JOO-lar men kolledjderdi tekserý jumystaryn jalǵastyrady
ASTANA. QazAqparat - Bilim mınıstrligi aǵymdaǵy jyly da Bas prokýratýramen birge jeke JOO-lar men kolledjderdi tekserý jumystaryn jalǵastyrady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Bilim jáne ǵylym mınıstri Aslan Sárinjipov aıtty.
«JOO-lar men kolledjder jelisin ońtaılandyrý boıynsha jumystar óz jalǵasyn tabady. 2014 jyly 5 joǵary oqý orny jabyldy. 8 oqý ornynyń lıtsenzııasy toqtatyldy. Úsh joǵary oqý oryn boıynsha materıaldar sotta jatyr. Aǵymdaǵy jyly da Bas prokýratýramen jeke JOO-lar men kolledjderdi tekserý jumystary jalǵasatyn bolady», - dedi mınıstr.
A.Sárinjipovtyń atap ótýinshe, joǵary bilim berý júıesinde bilim, ǵylym jáne óndiristi ıntegratsııalaý baǵytyndaǵy sharalar júzege asyrylýda. «Atap aıtqanda, tórt jetekshi JOO Ǵylymı zertteý ınstıtýttarymen, olardyń óndiristik bazalary men tájirıbelik sharýashylyqtarymen yqpaldastyrylatyn bolady. Máselen, Q.Sátbaev atyndaǵy QazUTÝ «Parasat» holdınginiń Jer, metallýrgııa jáne baıytý týraly ǵylym ortalyǵy, Geologııalyq ǵylym ınstıtýty syndy ǵylymı segiz ınstıtýtpen biriktiriledi», - dedi ol.
