A. Sárinjipov balalar lagerlerindegi jappaı ýlaný oqıǵalaryna qatysty pikirin bildirdi
ASTANA. QazAqparat - QR Bilim jáne ǵylym mınıstri Aslan Sárinjipov balalardyń jazǵy lagerlerindegi oqýshylardyń jappaı ýlaný oqıǵalaryna qatysty pikirin aıtty.
«Balalardyń jazǵy demalysy óte ózekti máselelerdiń biri jáne árdaıym ol mınıstrliktiń jiti baqylaýynda. Qazirgi ýaqytta balalardyń jazǵy demalys múmkindikterin keńeıtý maqsatynda jumys jasaýdamyz. Búgingi tańda memlekettik jáne jekemenshik lagerlerdiń sany eki myńǵa artty jáne 11 myńǵa jetip otyr. Olardyń basym bóligi jergilikti atqarýshy organdardyń qaraýynda», - dep atap ótti mınıstr.
Onyń sózine qaraǵanda, balalar demalysyn uıymdastyratyn uıymdardy jergilikti bilim berý departamentteri qadaǵalaıdy.
«Bizdiń departamentter arqyly monıtorıng jasap otyramyz jáne balalardyń tamaqtanýy, qaýipsizdigi jáne olardy qorǵaý, sonymen qatar kórsetiletin qyzmetterdiń sapasy óz deńgeıinde bolýyn qadaǵalaımyz. Árıne, oqys oqıǵalar bolyp jatady, olar jeke-jeke balalar quqyqtaryn qorǵaý komıtetinde qaralady. Árbir keleńsiz jaǵdaı boıynsha biz egjeı-tekjeıli qarap, tıisti qorytyndylar shyǵaramyz», - dedi A.Sárinjipov.
Aıta keteıik, eldiń birqatar lagerlerinde balalardyń jappaı ýlaný oqıǵalary tirkelgen bolatyn. Qazirgi ýaqytta tergeý júrgizilýde.
