A.Sárinjipov: Apatty jáne úsh aýysymdaǵy mektepter problemasy 2017 jylǵa qaraı sheshiledi
ASTANA. QazAqparat - Apatty jáne úsh aýysymdaǵy mektepter prbolemasy 2017 jylǵa qaraı sheshiledi. Bul týraly Ortalyq kommýnıkatsııalar qyzmetindegi baspasóz máslıhatynda QR Bilim jáne ǵylym mınıstri Aslan Sárinjipov málim etti.
«1 qyrkúıekte 7,5 myńnan astam mektep 2 mln. 600 myńnan astam oqýshyny qabyldaıdy, olardyń ishinde 336 myńy - mektep tabaldyryǵyn alǵash attaıtyn birinshi synyptyń balalary. Jyl saıyn birinshi synypqa baratyn balalar sany artyp keledi. Osyǵan baılanysty biz úsh aýysymdaǵy jáne apatty mektepter problemasyn sheshýimiz kerek. Sáıkesinshe, bıyl 157 mektep paıdalanýǵa beriledi. Osy arqyly úsh aýysymdaǵy mektepterdiń bizde 80-i qalady. Al buǵan deıin 100-ge jýyq bolǵan edi. Sonymen qatar apatty mektepter sany eki esege azaıyp, 136-dan 66-sy qalady. 2017 jyldyń sońyna qaraı osy problemany tolyqtaı sheshemiz dep josparlap otyrmyz», - dedi mınıstr. Munymen qosa, vedomstvo basshysy kúrdeli jóndeý sharalarymen 250 mektep qamtylǵanyn, al aǵymdaǵy jóndeý jumystary 5 myńnan astam mektepte júrgizilgenin jetkizdi. A.Sárinjipovtiń sózine qaraǵanda, 4,5,6 jáne 11 synyptarǵa oqýlyqtar alýǵa bıyl 12,5 mlrd. teńge bólingen. Búginde barlyq óńirler oqýlyqtarmen tolyqtaı qamtamasyz etilgendigin habarlaǵan. «Osy aptada baqylaý komıteti bul aqparatty tekserý sharalaryna kiristi», - dedi mınıstr.
