A.Sárinjipov: 9 jáne 11 synyp bitirýshileri úshin mamandyqtar bazasyn qurý qajet
ASTANA. QazAqparat - Qazaqstandaǵy 120 myńǵa jýyq kásiporynnyń tek 0,03 paıyzynda ǵana oqý ortalyǵy bar. Bul týraly búgin QR Parlamenti Májilisindegi «Tehnıkalyq jáne kásiptik, joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdaý barysynda QR Bilim jáne ǵylym mınıstri Aslan Sárinjipov málim etti.
«117849 kásiporynnyń tek 0,03 paıyzynda ǵana oqý ortalyǵy bar. Bul óte alańdatarlyq kórsetkish jáne ol óndiris tehnologııasynyń tómendigin nemese jumys berýshilerdiń jumys oryndaryn durys attestattamaýyn kórsetedi»,- dedi A.Sárinjipov.
Mınıstrdiń atap ótýinshe, atalǵan problemany sheshý úshin Eńbek jáne halyqty áleýmettik qorǵaý mınıstrligi kadrlar qajettiligin anyqtaý ádisin jan-jaqty talqylaýy ári jalaqysy men basqa da málimetterin kórsete otyryp, talap etiletin mamandyqtar bazasyn qurýy qajet.
«Mundaı baza qurý 9 jáne 11 synyp bitirýshileriniń mamandyq tańdaýyna kómektesedi. Ol úshin kásiporyndar, onyń ishinde shaǵyn jáne orta bıznes úshin memlekettik statıstıka nysanyn jańartý, sáıkesinshe ınfraqurylym qurý qajet», - dedi ol.
