A.Sárinjipov 10 úzdik magıstrantqa Nazarbaev stıpendııasyn tabys etti
ASTANA. QazAqparat - QR Bilim jáne ǵylym mınıstri Aslan Sárinjipov búgin Astanada elimizdiń 10 úzdik magıstrantyna N. Nazarbaev atyndaǵy stıpendııalardy tabys etti.
«Biz búgin Qazaqstan úshin ataýly kún, QR Tuńǵysh Prezıdenti kúniniń qarsańynda jınalyp otyrmyz. Ózderińiz baıqaýǵa qatysyp, ǵylymı-zertteý jumystarymen aınalysyp, ıdeıalaryńyzdy Qazaqstannyń damýyna jaratqylaryńyz kelip, búgin osynda kelip otyrsyzdar. Sondyqtan da men sizderdi shyn júrekten quttyqtaımyn», - dep atap ótti mınıstr.
A. Sárinjipovtiń sózine qaraǵanda, elimizde Memleket basshysynyń saıasaty arqasynda qazir jastarǵa barlyq múmkinshilikter jasalǵan.
«Endi JOO-da oqımyn deseń, jyl saıyn bizde 150 myńnan astam grant bólinedi. Shetelde bilim alam deseń, «Bolashaq» baǵdarlamasy arqyly shetelde eń úzdik ýnıversıtetterge baryp bilim ala alasyzdar. Ónermen aınalysam deseńiz, bizde jańa teatrlar, jańa sahnalar ashylýda. Sportpen shuǵyldanam deseńiz, jańa stadıondar ashylýda. Qarap otyrsańyzdar, Qazaqstanda barlyq múmkinshilikter bar. Ol úshin tek jaqsy oqý kerek, jumys isteý kerek. Sharshamaı osy úlesimizdi Qazaqstannyń damýyna qosý qajet», - deıdi ol.
Aıta keteıik, N. Nazarbaev atyndaǵy stıpendııa 2011 jyldan beri jyl saıyn ekinshi kýrs magıstranttaryna beriledi. Bıyl baıqaýǵa 46 magıstrant qatysty, solardyń ishinen eń úzdik dep tanylǵan ár óńirdiń 10 magıstrantyna stıpendııa taǵaıyndaldy.
