A.Samaqova Aýǵan soǵysy ardagerleri qozǵalysynyń basshylarymen kezdesip, túıtkildi máselelerimen tanysty
MATY. 26 tamyz. QazAqparat /Ádilet Musahaev/ - Búgin Almatydaǵy «Nur Otan» HDP-nyń keńsesinde QR Parlamenti Májilisiniń depýtaty Aıtkúl Samaqova Aýǵan soǵysy ardagerleri qozǵalysynyń basshylaryn qabyldap, olardyń kókeıinde júrgen máselelerin tyńdady.
Qazirgi tańda aýǵan soǵysy ardagerlerimen basqa da soǵysqa qatysýshylardyń sheshilmeı kele jatqan máseleleri bar. Máselen, ardager mártebesiniń saqtalmaýy, turǵyn-úımen qamtamasyz etilmeýi, áleýmettik járdemaqy jáne taǵy basqa sheshýin tappaı kele jatqan túıtkildi máseleler.
Osyǵan oraı óziniń kezekti demalysynda júrgen Májilis depýtaty olarmen kezdesip, máseleniń qaıdan týyndap otyrǵandyǵyn anyqtaýǵa tyrysty. Nátıjesinde «Soǵysqa qatysýshylar» jónindegi zańnyń qabyldanýy, «Turǵyn-úımen qamtamasyz etý» zańyna qaıta ózgerister engizý jáne aýǵan soǵysy men basqa da soǵysqa qatysqandardyń áleýmettik jaǵdaıy kóterildi.
Aýǵan soǵysy ardagerleri odaǵynyń tóraǵasy Murat Abdýshýkýrov aýǵan soǵysynyń ardagerleri Otan aldyndaǵy boryshtaryn Aýǵanstanda atqaryp, qazirgi kúni jastardy patrıottyqqa tárbıeleý jumystarymen aınalysyp jatqandyǵyn aıta kele, qazir olardyń turǵyn-úı máselesimen bastary qatyp otyrǵandyǵyn jetkizdi. «Qazaqstan úkimeti aýǵan soǵysyna qatysýshylarǵa páter bergen bolatyn, alaıda ony ardagerler óz atyna shyǵara almaı otyr. Óıtkeni sońǵy qabyldanǵan zańnyń tarmaqtarynda «aýǵan soǵysynyń ardagerlerine» degen sóz enbeı qalǵan», -deıdi ol.
A.Samaqova zań qabyldamas buryn ony aldymen jumys barysynda tekserip, halyq tanysý úshin saıtqa iletindikterin aıtyp ótti. «Halyq onymen tanysyp, qosymsha túzetýler men ózgertýler qosqany biz úshin mańyzdy. Búgingi kóterilgen máselelerdi aldymen depýtattar arasynda qarap, keıin aýǵan soǵysy ardagerleriniń qatysýymen jan-jaqty talqylaıtyn bolamyz», -dedi Májilis depýtaty.
