A.Rahmetýlın: Sot tóreligi ınstıtýtyn Joǵarǵy sot qaramaǵyna bergen jón

ASTANA. QazAqparat - Sot tóreligi ınstıtýtyn Joǵarǵy sot qaramaǵyna bergen jón. Bul týraly búgin QR Prezıdenti janyndaǵy OKQ-inde ótken brıfıngte QR Joǵarǵy Soty Qylmystyq ister jónindegi qadaǵalaýshy sot alqasynyń tóraǵasy Abaı Rahmetýlın málim etti.

Sot tóreligi ınstıtýty magıstratýrasynda kadrlyq rezervti daıyndaý máselesine toqtalǵan ol: «Joǵarǵy sot dál osy mamandandyrylǵan bilim berý bolashaq sýdıalardyń sapasyn aıtarlyqtaı jaqsarta túsetindigine senimdi. Degenmen, búgingi tańda Sot tóreligi ınstıtýtynda bilim berýdiń nátıjesi tek quqyq magıstri dárejesin berý ǵana bolyp otyr», - dedi.

Komıtet tóraǵasynyń aıtýynsha, oqýyn támamdaǵan magıstrant biliktilik emtıhanyn óziniń qalaýy boıynsha ǵana tapsyrady. Sonymen qatar magıstr sýdıa laýazymynyń bos ornyn ıelený úshin baıqaýǵa qatysa alady, biraq mindetti emes.

«Biz mamandandyrylǵan magıstratýranyń negizgi mindeti sot júıesi úshin biliktiligi joǵary rezerv daıyndaý bolýy tıis dep sanaımyz. Onyń sońǵy maqsaty kadrlyq rezervke alyný bolýy tıis. Al sýdıa laýazymynyń bos ornyn ıelený úshin baıqaýǵa qatysýdy mindetti jasaý qajet. Osylaısha, magıstratýrada bilim alýdyń nátıjesi sýdıalyqqa kandıdattardy daıyndaý bolýy kerek. Bul tájirıbe Frantsııada tabysty júzege asyrylýda. Buǵan qosa, Ekonomıkalyq yntymaqtastyq jáne damý uıymynyń Sot tóreligi ınstıtýtyn Joǵarǵy sot qaramaǵyna berý týraly usynysyn qoldaımyz», - dedi A.Rahmetýlın.