A.Rahmetýlın: Sot tóreligi ınstıtýty magıstranttaryna sýdıalyqqa biliktilik emtıhanyn tapsyrýda mindetti psıhologııalyq testileý engizý qajet

ASTANA. QazAqparat - Sot tóreligi ınstıtýty magıstranttaryna sýdıalyqqa biliktilik emtıhanyn tapsyrýda mindetti psıhologııalyq testileý engizý qajet. Bul týraly búgin QR Prezıdenti janyndaǵy OKQ-de ótken brıfıngte QR Joǵarǵy Soty Qylmystyq ister jónindegi qadaǵalaýshy sot alqasynyń tóraǵasy Abaı Rahmetýlın málim etti.

A.Rahmetýlın óz sózinde mamandandyrylǵan magıstratýrany bitirgen sýdıalyqqa kandıdattarǵa qoıylatyn biliktilik talaptaryn kúsheıtý máselesine toqtaldy.

«21-22 jas bul joǵary zańgerlik bilim alý kezeńi. 25-27 jas Sot tóreligi ınstıtýtyna magıstratýrada bilim alý úshin túsetin ýaqyt. 28-29 jasta bir jyldan úsh jylǵa deıingi synaq merzimimen sot laýazymyna taǵaıyndalý úshin baıqaýǵa qatysýy qajet», dedi Sot alqasynyń tóraǵasy.

Onyń sózine qaraǵanda, odan keıin 30-32 jasta Prezıdenttiń sýdıa laýazymyna taǵaıyndaý týraly Jarlyǵy shyǵýy kerek.

«Mamandandyrylǵan magıstratýrada sýdıa laýazymyna biliktilik emtıhanyn tapsyrý barysynda mindetti psıhologııalyq testileý engizý qajet», - dedi ol.