A-parking aqyly avtoturaqtarynyń burynǵy dırektorlaryn qamaýda ustaý merzimi uzardy

ALMATY. QazAqparat - Sot «Almaty spetstehparkıng servıs» JShS-niń burynǵy dırektory Marat Pirinbekov pen AlanParking JShS burynǵy bas dırektory Muhtar Bazarbaevty qamaýda ustaý merzimin uzartty, - dep habarlaıdy QazAqparat tilshisi.

Bul týraly Almatynyń mamandandyrylǵan aýdanaralyq tergeý soty málim etti.

«12 qyrkúıek kúni tergeý sotynyń qaýlysymen, sotqa deıingi tergeý organdarynyń ótinishi qanaǵattandyryldy. Marat Pirinbekovti qamaýda ustaý merzimin 15 qazanǵa deıin uzartyldy. Sot sheshimi zańdy kúshine engen joq», - dep habarlady qalalyq sottyń baspasóz qyzmeti.

Sonymen qatar, 22 tamyzda osy sot Alan Parking-tiń burynǵy basshysy Muhtar Bazarbaevty qamaýda ustaý merzimin 2022 jyldyń 26 qyrkúıegine deıin uzartý týraly sheshim shyǵarǵan bolatyn.

Eske salaıyq,14 sáýir kúni «Alan Parking» JShS dırektory Muhtar Bazarbaev eki aıǵa qamaýǵa alynǵan bolatyn.

Aıta keteıik, Almatyda aqyly avtoturaq júıesi alǵash ret 2016 jyly engizildi.

Joǵaryda atalǵan kompanııalardyń aqparaty boıynsha, aqyly turaqtardan qarjy aınalymy jylyna orta eseppen 1,4 mlrd teńge boldy.