A.Óteshov pen J.Qydyrbaev Rıo olımpıadasynan shettetildi

ASTANA. QazAqparat - Almas Óteshov pen Jasulan Qydyrbaev Rıo olımpıadasyna barmaıdy. Bul týraly búgin BAQ ókilderiniń saýalyna jaýap bergen QR Mádenıet jáne sport mınıstri Arystanbek Muhamedıuly málim etti.

Qazaqstan Respýblıkasynda 2006-2016 jyldarǵa arnalǵan genderlik teńdik strategııasyn iske asyrýdyń aldy ala qorytyndylaryna arnalǵan halyqaralyq konferentsııa aıasynda BAQ ókilderiniń dopıngpen ustalǵan sportshylarǵa shara qoldanyla ma, degen saýalyna jaýap bergen mınıstr: «Árıne, qoldanylady. Biz mundaı daýǵa ilikken sportshylardy jarystan alyp jatyrmyz. Máselen, bir aýyr atlet qyzymyz ómir boıyna sporttan shettetildi. Biz buǵan qatań qaraýymyz kerek», - dedi ol.
Buǵan qosa ol, Almas Óteshov pen Jasulan Qydyrbaevqa da shara qoldanylǵanyn, onyń biri 1 jylǵa, ekinshisi 2 jylǵa sporttan shetetilgendigin atap aıtty. Demek, bul sportshylarymyz aldaǵy Rıo olımpıadasynan shettetilgen.
Sonymen qatar A.Muhamedıuly Olımpıada jeńimpazy atanǵan sportshylarǵa beriletin syıaqy kólemi ózgerissiz qalatyndyǵyn atap ótti.
«Bizde Úkimettiń bekitilgen qarajaty bar. Birinshi orynǵa 250 myń, ekinshi orynǵa 150 myń, úshinshi orynǵa 75 myń dollar beriledi. Bul naqty úkimetten bólinetin qarjy. Munan bólek, ózderińiz biletindeı, árbir federatsııa, oblystar óz deńgeıinde sportshylarǵa qurmet kórsetip jatady. Meniń oıymsha, bizdiń jeńimpazdarǵa beriletin aqshalaı syılyq dúnıejúzindegi eń kólemdi syılyqtardyń biri», - dedi ol.