A.Myrzahmetov agroónerkásiptik keshendegi salalyq odaq basshylarymen agrobıznestiń ózekti máselelerin talqylady
Keńes barysynda agrobıznestiń problemalyq máseleleri talqylandy.
Salalyq birlestikterdiń ókilderi negizinen agroónerkásiptik keshendi sýbsıdııalaý júıesin reformalaý jáne qarjylandyrýdyń jetkiliksizdigi jónindegi máselelerdi kóterdi. Sondaı-aq, mal sharýashylyǵy salasyndaǵy birlestikter veterınarlyq qaýipsizdikti qamsyzdandyrý, eksporttyq/ımporttyq kedergiler, qus ósirý sharýashylyqtaryn jemdik dánmen qamtamasyz etý boıynsha máseleler sóz etildi.
«Ósimdik ósirý salasyndaǵy birlestikte saladaǵy sýmen qamtamasyz etý, fıtosanıtarlyq talaptarǵa sáıkes kelmeıtin ónimdi alyp kelý kezinde týyndaıtyn qaýip, elektrondyq astyq qolhattaryn engizý merzimderi jáne basqa da problemalar jaıynda sóz qozǵaldy.Taǵamdyq ónim óndirýshileri kásiporyndardy shıkizat bazasymen qamtamasyz etý, aýyl sharýashylyǵy ónimderin qaıta óńdeýshiler úshin 2018 jyldan bastap, QQS tóleý boıynsha jeńildikti rejımderdi alyp tastaý, saýda oryndarymen ózara is-áreket problemalary jáne basqa da máselelerdi kóterdi», delingen habarlamada.
Aýyl sharýashylyǵy mınıstri kezdesýde kóterilip otyrǵan máselelerdiń kópshiligi mınıstrlikte qaralyp, ázirlengen Agroónerkásiptik keshendegi ınvestıtsııalyq klımatty jaqsartý jónindegi is-sharalar josparyna engizdi. Atalǵan jospar Qazaqstan Respýblıkasy Úkimetiniń qaýlysymen bekitiledi.
Buǵan qosa, Aýyl sharýashylyǵy mınıstri osy máselelerdiń barlyǵyn qazirgi kezde Mınıstrlikte memlekettik organdardyń, bıznestiń, ǵylym ókilderiniń, sarapshylardyń - búkil múddeli taraptyń ókilderiniń qatysýymen qurylyp jatqan salany sýbsıdııalaý júıesin reformalaý, kooperatsııany damytý jáne jeke qosalqy sharýashylyqtardyń jaǵdaıyn jaqsartý jónindegi jumys toptarynyń sheńberinde qarastyrýdy usyndy.
Sondaı-aq, Mınıstr óziniń tóraǵalyǵymen arnaıy keńes qurýyna daıyn ekendigin atap ótti. Bul keńes Mınıstrlik pen agrobıznes arasynda turaqty syndarly suhbat júrgizýge yqpal etedi.
Anyqtama úshin: Qazirgi tańda Qazaqstan Respýblıkasynyń agroónerkásiptik kesheninde 23-i «Atameken» UKP-da akkredıttelgen 37 salalyq odaq, qaýymdastyq jáne iri qara mal tuqymdarynyń respýblıkalyq palatalary qyzmet etedi.