A. Myrzahmetov: Agrarlyq saıasat jónindegi keńes problemalardy sheshýdiń joldaryn qarastyratyn alań bolýy kerek
ASTANA. QazAqparat - QR Aýyl sharýashylyǵy mınıstrligi janynan Agrarlyq saıasat jónindegi keńes qurylyp, QR Premer-Mınıstriniń orynbasary - QR Aýyl sharýashylǵy mınıstri A.Myrzahmetovtyń tóraǵalyǵymen keńestiń alǵashqy otyrysy ótti.
Keńes quramyna memlekettik organdar, salalyq odaqtar, zertteý ortalyqtary, kásiporyndar jáne úkimettik emes uıymdar ókilderi kirdi, dep habarlaıdy QR AShM baspasóz qyzmeti.
Alǵashqy otyrys beınebaıan arqyly ótip, kún tártibinde asa mańyzdy tórt másele talqylandy. Atap aıtqanda, sýbsıdııa salasyndaǵy júıeni jetildirý, shaǵyn, orta jáne iri sanattaǵy bıznesterdiń talaptaryn qaıta qaraý, aýyl sharýashylyq ónimderiniń baǵalaryn retteý máseleleri, qus fabrıkalarynyń turaqty damýy úshin ınfraqurylymdy jetildirý.
Otyrystyń ózgesheligi, naqty máselelerge arnalǵan suraq-jaýap formatynda júrgizildi.
Keńestiń jumysyna AÓK salasynda eńbek etettin árbir azamat qatysa alatyndyǵyn otyrys barysynda keńes tóraǵasy aıtyp ótti.
«Bul keńes qaǵaz júzinde qalatyn keńes bolmaýy kerek. Keńes árdaıym kúrdeli másele kóterip, aqyldasyp, aýyl sharýashylyǵyndaǵy ózekti problemalardy aıtyp qana qoımaı, ony naqty sheshýdiń joldary men mehanızmderin qarastyratyn alań bolýy kerek. Sol úshin belsene jumys jasaýǵa shaqyramyn», - dedi A.Myrzahmetov. Sondaı-aq, keńes músheleri otyrys barysynda aıtylǵan usynystardy biraýyzdan quptap, osyndaı konstrýktıvti alańnyń kerektigin aıtty.
Sonymen qatar, buǵan deıin Mınıstrlik janynan AÓK salasyndaǵy memlekettik qoldaý sharalaryn jetildirý boıynsha arnaıy jumys toby qurylǵan. Osy toptyń usynystary Keńes otyrysynda qarastyrylatyn bolady.
Aıta ketsek, jańadan qurylǵan Keńes Qazaqstan Respýblıkasynyń Agroónerkásip keshenin qoldaýǵa baǵyttalǵan memlekettik saıasattyń júzege asýyna atsalysatyn birden-bir organ bolyp qalyptaspaq. Sonymen qatar, azyq-túlik qaýipsizdigin qamtamasyz etetin, sondaı-aq, aýyl halqynyń jumyspen qamtylý deńgeıin arttyrýǵa yqpal etetin básekege qabiletti agroónerkásiptik keshen qurýǵa járdemdesetin Keńes bolyp tabylady.
Alǵashqy jıynda aıtylǵan barlyq usynys-pikirler hattamaǵa toltyrylyp, Keńes múshelerine kelisýge joldandy.
