A.Musaqojaeva Chaıkovskıı atyndaǵy halyqaralyq konkýrsty Qazaqstanda ótkizý týraly usynys aıtty
ASTANA. QazAqparat - Álemge tanymal skrıpkashy, Qazaqstan Respýblıkasynyń halyq ártisi, «Shabyt» óner ýnıversıtetiniń rektory Aıman Musaqojaeva Qazaqstan Chaıkovskıı atyndaǵy halyqaralyq konkýrsty ótkizýge ábden laıyq el deıdi. Bul oıyn halyq ártisi búgin «Shabyt» festıvaline oraı Ortalyq kommýnıkatsııalar qyzmetinde ótken brıfıngte málim etti.
«Bul halyqaralyq festıval bizdiń respýblıkamyz úshin jaqsy «jarnama» bolatyn edi. Ónerimiz ústem bola túser edi. Biz osy halyqaralyq forýmǵa qatysyp, qazylar alqasynyń qatarynan tabylýǵa daıynbyz. Bul konkýrs Japonııa, Ońtústik Koreıada, árıne, Máskeýde ótti. Endi Qazaqstanda uıymdastyrylsa, óte qyzyqty joba bolar edi», - deıdi A.Musaqojaeva.
Al, Chaıkovskıı atyndaǵy halyqaralyq konkýrstyń laýreattar qaýymdastyǵynyń bas dırektory Andeı Şerbak «Shabyt» festıvaliniń jeńimpazdaryn Máskeýde kontsert qoıýǵa shaqyrdy.
«Bul máseleni árıne Aıman Musaqojaeva ekeýmiz ǵana talqyladyq. Degenmen, «Shabyt» festıvalinde skrıpka atalymynda boıynsha jeńgen jastar Máskeýde kontsert qoısa, olar úshin tamasha múmkindik bolar edi. Búgin Musaqojaeva hanym ekeýmiz mindetti túrde osy máseleni pysyqtaı túsemiz», - dedi ol.
Esterińizge sala keteıik, keshe Astanada «Shabyt» XVIIІ Halyqaralyq shyǵarmashylyq jastar festıvali bastaldy. Festıvalge barlyǵy 388 úmitker qatysamyz dep ótinish bergen. Konkýrsanttardyń talantyn ataqty ártister, professorlar, Qytaı, Germanııa, Izraıl, Italııa, Belarýs, Reseı jáne Qazaqstannan shyqqan álemge tanymal óner maıtalmandary baǵalaıdy.
