A.Muhamedıuly: Sońǵy 5 jylda qazaq fılmderi kórermenderiniń sany 400 esege artty

ASTANA. QazAqparat - Sońǵy 5 jylda qazaq fılmderi kórermenderiniń sany 400 esege artty. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Mádenıet mınıstri Arystanbek Muhamedıuly málim etti.

«Sońǵy 5 jyldyń ishinde kınoteatrlarda kórsetiletin qazaq fılmderiniń kórermenderi sany 400 esege artty. Bul, árıne, bizdiń óner týyndylarymyzǵa degen qyzyǵýshylyqtyń artyp kele jatqandyǵyn pash etedi», - dedi ol.

Onyń atap ótýinshe, búgingi tańda otandyq kınolardyń sapasy artyp, Á.Erjanov, Sh.Orazbaeva, A.Sataev syndy daryndy rejısserlerdiń týyndylary halyqaralyq baıqaýlarda da kórsetilýde.

«Máselen A.Sataev fılosofııalyq rejısser. Onyń «Adasqandar» fılmi kıno maıtalmandary tarabynan óte sátti, fılosofııalyq týyndy degen baǵasyn alǵan bolatyn. Bul turǵyda E.Tursynov ta óte jemisti jumys isteýde», -dedi mınıstr.