A. Muhamedıuly shahmattan tórt dúrkin álem chempıonyn qabyldady
ASTANA. QazAqparat - Búgin Mádenıet jáne sport mınıstri Arystanbek Muhamedıuly shahmattan tórt dúrkin álem chempıony Dınara Sádýaqasovany qabyldady, dep habarlaıdy QazAqparat atalǵan vedomostvonyń baspasóz qyzmetine silteme jasap.
Tanymal shahmat hanshaıymy mınıstrge jańa jetistikteri jóninde baıandady. Osy jyly Dınara Vetnamda ótken HD Bank Cup International Open Chess 2017 halyqaralyq týrnırinde áıelder arasynda birinshi oryn alyp, óziniń reıtıngindegi ornyn jaqsartqan bolatyn. Reıtıngtegi bedeli ósken Dınara Sádýaqasova álemniń 30 úzdik áıelderiniń qataryna engen alǵashqy qazaqstandyq shahmatshy boldy.
Mınıstr men shahmatshy jastardy shahmatqa baýlý arqyly sportqa tartý, eldegi buqaralyq sportty damytý máselelerin talqylady.
Dınara Sádýaqasova elimizde shahmatty nasıhattaýmen belsendi aınalysady. Ótken jyly Astanada Dınara Sádýaqasovanyń shahmat akademııasy ashyldy. 2013 jyldan bastap L. Gýmılev atyndaǵy Eýrazııa Ulttyq ýnıversıtetiniń stýdentteri men oqytýshylarynyń bastamasy boıynsha Dınara Sádýaqasovanyń shahmat klýby ashylǵan. Ýnıversıtet jyl saıyn «Grossmeıster Sádýaqasovanyń kýbogy» shahmat týrnırin ótkizedi.
Qazaqstandyq shahmatshy sondaı-aq, «Shahmattaǵy alǵashqy qadam» atty óziniń kitabyn qaıta shyǵarmaqshy. Bul týyndy kóptegen jas shahmatshylar úshin súıikti kitapqa aınalǵan.
A. Muhamedıuly sportshy qyzdyń belsendi qoǵamdyq kózqarasyn qoldady.
«Shahmat arqasynda bizdiń balalarymyz men jasóspirimderimiz oı-órisin, emotsııalyq turaqtylyǵyn damytyp, strategııalyq jáne taktıkalyq oılaný, sabyrly bolýdy, este saqtaý qabiletin, sondaı-aq úılesimdi fızıkalyq jáne ıntellektýaldyq damýyn qalyptastyra alady» - dep atap ótti mınıstr.
Áńgime barysynda Dınara bos ýaqytynda shahmattan basqa, mýzyka, júzýmen aınalysyp, tilder úırenetindigin atap ótti. Ol sondaı-aq, P. Chaıkovskıı atyndaǵy mýzykalyq mektepti fortepıano klassy boıynsha úzdik bitirgen.
