A. Muhamedıuly latyn álipbıine kóshýge asyqpaý qajettigin aıtty
ASTANA. QazAqparat - Búgin Ortalyq kommýnıkatsııalar qyzmetindegi brıfıngte QR Mádenıet jáne sport mınıstri Arystanbek Muhamedıuly latyn álipbıine kóshýge asyqpaý qajettigin aıtty.
Latyn qarpine kóshý - bul uzaqmerzimdi baǵdarlama ekenine toqtalǵan mınıstr, osy baǵytta negizgi qadamdar 2025 jyldary iske asyrylatyndyǵyn jetkizdi. Vedomstvo basshysynyń aıtýynsha, búginde ǵalymdar osy máseleni tyńǵylyqty zerttep jatyr. Bul turǵyda kompıýter klavıatýrasyna ıntegratsııalaýda problema bar kórinedi.
Sonymen birge A. Muhamedıuly latyn álipbıine kóshý aldynda oqý baǵdarlamalaryn saýatty túrde daıarlap alý kerektigin atap ótti. Onyń paıymynsha, asyǵystyq saldarynan oqýlyqtar men bilim berý baǵdarlamalarynda kemshilikter kóp bolýy múmkin.
«Sondyqtan da osy baǵyttaǵy úderis qatty jyldamdatylǵan túrde júrip jatqan joq. Meniń oıymsha, bul úderisti jyldamdatýdyń qajettilgi joq. Sebebi, ol eń aldymen bilim berý máselesine kelip tireledi. Sondaı-aq osy úderis bizdiń qyzmetimizge keri áserin tıgizbeýi tıis»,-dedi ol.
Sóz sońynda mınıstr latynǵa kóshý boıynsha baǵdarlama qabyldanǵanyn jáne ony júzege asyrý tıisti keste boıynsha júretindigin aıtty.
