A. Muhamedıuly djıý-djıtsýdan álem chempıonatynda top jarǵan qazaqstandyq sportshylardy quttyqtady

ASTANA. QazAqparat - QR Mádenıet jáne sport mınıstri Arystanbek Muhamedıuly Ábý-Dabıde ótken djıý-djıtsýdan kásipqoılar arasyndaǵy álem chempıonatynda tabysty óner kórsetken qazaqstandyq sportshylardy quttyqtady.

«Іri halyqaralyq dodada el namysyn 135 sportshy qorǵady, bul bizdiń elde atalǵan sport túriniń qarqyndy damyp kele jatqandyǵyn taǵy bir márte dáleldeıdi. Qazirgi tańda sporttyń osy túrine baýlıtyn sektsııalar elimizdiń 12 oblysynda jáne eki qalasynda jumys isteıdi ári onda 10 myńnan astam qazaqstandyq jattyǵady. Bul osy sportqa qyzyǵýshylyqtyń óte joǵary ekendigin kórsetedi. Sizder budan keıin de halyqaralyq dodalarda el mereıin ústem etip, namysymyzdy qorǵaısyzdar dep senemiz», - dep atap ótti mınıstr.

Eske sala keteıik, Djıý-djıtsýdan Qazaqstan quramasy Ábý-Dabıde ótken kásipqoılar arasyndaǵy álem chempıonatynda 51 nagrada enshiledi. Oǵan álemniń 100 elinen 5 myńnan astam sportshy qatysqan bolatyn.