A.Muhamedıuly 28 panfılovshylar týraly fılmge Qazaqstan 80 mln teńge bólgenin rastady

ASTANA. QazAqparat - Birneshe kún buryn Reseıdiń buqaralyq aqparat quraldarynda 28 gvardııashy-panfılovshylar týraly fılmniń túsirilimine Qazaqstan 80 mln teńge bóldi degen aqparat jarııalandy. QazAqparat tilshisiniń suraǵyna jaýap bere otyryp, elimizdiń mədenıet jəne sport mınıstri Arystanbek Muhamedıuly bul aqparatty rastady.

"Men bul aqparatty rastaımyn. Eń əýeli 28 panfılovshylar týraly fılm túsiriledi degen kezde reseılik əriptesim V.Medınskıımen (Reseıdiń Mədenıet mınıstri) eki memleket fılmniń túsirilimine kómektesedi dep kelisken bolatynbyz. Qazaqstan tarapy 1 mln dollar, Reseı tarapy 2 mln dollar bóledi degen kelisimge qol qoıǵanbyz. Biraq sońǵy ekonomıkalyq jaǵdaılarǵa baılanysty biz 80 mln teńge bóldik. Degenmen Qazaqstan tarapy Reseıdiń túsirilim tobyna tehnıka jaǵynan kóp kómek berdik. Reseıde fılm treıleriniń kórsetilimi shyqty. Fılm tolyq aıaqtalǵan soń Qazaqstanda da prokatqa shyǵady. Fılmniń bas jaǵy dańqty batyr Baýyrjan Momyshulynyń sózimen bastalsa, sońy Almaty qalasyndaǵy 28 panfılovshylarǵa arnalǵan eskirtkishtiń kórinisimen aıaqtalady", - dep atap ótti mınıstr. Aıta keteıik, fılmniń bıýdjeti týraly aqparat Reseıdiń "Vestı.rý" saıtynda jarııalanǵan bolatyn. Maqalada aıtylǵandaı, panfılovshylar týraly fılmniń jalpy bıýdjeti 150 mln rýbldi qurap otyr. Onyń ishinde, halyqtan 34 mln rýbl jınalsa, Reseıdiń Mədenıet mınıstrligi 30 mln rýbl, Qazaqstannyń Mədenıet mınıstrligi 19 mln rýbl (80 mln teńge) bólgen.