A.Mamytbekov: Otandyq terini kólik oryndyqtaryn tigýge qoldaný jaıy qarastyrylyp jatyr
Eldegi aýyl sharýashylyq salasynyń damýyna toqtalǵan mınıstr, Qazaqstanda suranysqa ıe emes jún men teri óndirisiniń negizgi túıtkilderine toqtaldy.
"Bizdiń elde óndiriletin júnniń tek bııazy jún dep atalatyn túri ǵana suranysqa ıe. Ondaı óndiriletin júnniń kólemi 6-7 myń tonna, onyń 2 myń tonnasy Tarazda topske deıin óńdelip, Italııaǵa eksporttalýda. Topstan jip jasap, jipten mata, matadan kıim jasaý - mınıstrliktiń quzyryna kirmeıdi, biraq oǵan suranys bar. Mysaly, oqýshylar kıiminiń jyl saıynǵy qajetti kólemi 2 mıllıon sharshy metrge jýyqtaıdy. Biz buny quzyrly mınıstrlikpen birge júndi tops kúıinde qaldyrmaı, ary qaraı óńdep, kıim shyǵaratyndaı etip, Túrkııa men Qytaıdan kıim-keshek ákelmeı, osy jerde-aq ony óńdeıtindeı jol izdep jatyrmyz", - dedi ol búgin OKQ brıfınginde.
Onyń sózine qaraǵanda, aýyldarda suraýsyz jatqan terilerdi jaratý jaǵy qarastyrylyp jatyr.
"Terini aıtatyn bolsaq, ony da damytýǵa múddelimiz, biraq ol bizdiń quzyretimizge jatpaıdy, terini tereń óńdeý baǵyty Investıtsııalar jáne damý mınıstrligine jatady. Biz olarǵa usynys jasadyq, qazir biz kólik óndirisin jolǵa qoıyp jatyrmyz, sol kóliktiń oryndyqtary teriden jasalynǵan kezde ony daıyn kreslo túrinde alyp kelemiz. Nege ony óz elimizde teriden tikpeske?! Bizdiń sharýalarymyzǵa orasan kómek bolatyn edi. Suranysqa ıe bolmaı jatqan teri óter edi. Shıkizat túrinde Qytaıǵa, Túrkııaǵa ketip jatyr, sodan daıyn ónim keledi. Bul árıne durys emes", - dedi mınıstr.