A.Mamytbekov mınıstrliktiń árbir komıtetinde jemqorlyqqa jol beretin árekettermen kúresetin keńester qurýdy usyndy
ASTANA. 24 aqpan. QazAqparat - Aýyl sharýashylyǵy mınıstri Asyljan Mamytbekov mınıstrliktiń árbir komıtetinde kásipkerlikti qoldaý jáne sybaılas jemqorlyq áreketterimen kúres jónindegi keńesterdi qurýdy usyndy.
Mınıstr bul týraly búgin, Memleket basshysynyń Qazaqstan halqyna arnaǵan bıylǵy Joldaýynda kóterilgen elimizdiń agroónerkásip kesheninde sybaılas jemqorlyq áreketterin joıý jónindegi mindetterin talqylaýǵa arnalǵan jıynda aıtty.
Vedomstvo basshysy elimizdiń kásipkerlik salasynyń ókilderin osy keńesterdiń jumysyna belsendi qatysýǵa shaqyrdy. «Keńes ókilderi komıtettiń quzyryndaǵy árbir qujatty búge-shigesine deıin jan-jaqty talqylap shyǵýy kerek. Al komıtettiń jetekshileri óz quzyryndaǵy árbir qujattyń qajettigin jáne odan týyndaıtyn mindetterdiń talapqa saı júzege asyrylyp jatqandyǵyn dáleldeýi kerek. Bul komıtet qujattarynyń barlyǵyn joıyp jiberý degendi bildirmeıdi. Mundaǵy maqsat qajetti qujattyń barynsha tıimdi jumys isteýine yqpal etip, jemqorlyqqa jol beretin qujattardy alyp tastaý»,-dedi mınıstr.
Onyń sózinshe, komıtet qujattaryn jan-jaqty talqylaǵan keńes ókilderi bul baǵyttaǵy jumystardan tıisti qorytyndy shyǵaryp, ony mınıstrlikke joldaıdy. Al mınıstrlik osy qorytyndy negizinde jumysty jemqorlyq áreketterinsiz qalaısha tıimdi júzege asyrýǵa bolatyndyǵyn oılastyra.
«Osy rette aıta ketetin másele, biz aldynda ýáde etkenimizdeı, sýbsıdııalaýdyń erejeleri jónindegi barlyq málimetterdi mınıstrliktiń saıtyna ornalastyrdyq»,-dedi A.Mamytbekov.
