A. Mamytbekov «Damý» qorynyń jumysymen kelispeıdi

ASTANA. 23 qyrkúıek. QazAqparat - Búgin QR Prezıdenti janyndaǵy Ortalyq kommýnıkatsııalar qyzmetinde baspasóz máslıhatyn ótkizgen QR Aýyl sharýashylyǵy mınıstri Asyljan Mamytbekov «Damý» qorynyń búgingi keıbir qarjylandyrý sharalarymen kelispeıtindigin jetkizdi.

Mınıstrdiń aıtýynsha, búginde Qazaqstanda astyq dıirmenderiniń sany tym kóp bolyp tur. «Kásipkerler onyń barlyǵyn kezinde kóptep salyp tastaǵan. Sonyń ishinde san alýan memlekettik baǵdarlamalar aıasynda boı kótergen dıirmender de bar. Sol kezde naryqtaǵy jaǵdaı jáne naqty suranys durys zerttelgen de joq. Endi ol nysandardyń basym bóligi toqtap tur. Jalpy, dıirmenderdiń qazirgi profıtsıti (suranystan artyq bolýy - avt.) 60 paıyzdy qurap otyr», - deıdi A. Mamytbekov. Onyń sózine qaraǵanda, 2009 jyly «QazAgro» holdıngi osy saladaǵy qarjylyq saıasatyn tolyǵymen ózgertti. Sodan beri onyń qarjysyna birde-bir dıirmen salynbady. «Ókinishke qaraı, bizde «Damý» qory bar ǵoı, ózderiniń qarjylandyrý baǵdarlamalaryn bizben kelisip jatpaıdy. Al dıirmenderdiń profıtsıti bolyp jatqan kezde, ondaı óndiriske qoldaý jasap, qarjylandyrý durys emes», - dep atap kórsetti mınıstr.