A.Mamın Transkaspıı halyqaralyq kólik marshrýtyn damytý komıtetiniń tóraǵasy bolyp saılandy
«QTJ» UK» AQ baspasóz qyzmetinde habarlaǵandaı, Tbılısıde 18-19 mamyrda Dostastyqqa qatysýshy memleketterdiń Temir jol kóligi keńesiniń 64-shi otyrysy ótedi.
Osy shara qarsańynda «Qazaqstan temir joly» UK» AQ prezıdenti Asqar Mamınniń tóraǵalyq etýimen Transkaspıı halyqaralyq kólik marshrýtyn damytý jónindegi úılestirýshi komıtettiń kezekti otyrysy ótti.
Sóılegen sózinde A. Mamın THKM básekege qabilettiligin damytý, marshrýtty Eýrazııanyń mańyzdy kólik dálizderiniń biri retinde qalyptastyrý mańyzdylyǵyna toqtaldy.
«Osy qurylymnyń jumys istegen ýaqytynda, 2014 jylǵy aqpannan bastap tıimdi tarıftik saıasat qalyptastyrý, júkterdi tasymaldaýdyń biryńǵaı tehnologııasyn engizý, Nomad Express birlesken ıntegratsııalanǵan logıstıkalyq ónim qurý boıynsha eleýli jumystar atqaryldy. Alǵashqy tranzıttik konteınerlik poıyz iske qosyldy, Halyqaralyq transkaspıı konsortsıýmy quryldy. Transkaspıı dálizine qatysýshy elder sany artty. Búgin komıtette Qazaqstan, Qytaı, Ázerbaıjan, Grýzııa, Túrkııa, Ýkraına, Rýmynııa - jeti elden temir jol, teńiz, porttyq ákimshilik, logıstıkalyq kompanııalar usynyldy», - dep atap ótti A. Mamın.
Otyrys barysynda konteınerlik, vagondyq, kontreılerdik tasymaldarǵa qatysty THKM boıynsha básekege qabiletti stavkalar belgileý máseleleri talqylandy.
THKM marshrýty boıynsha tasymaldaýdy damytýdy, komıtet qyzmetin uıymdastyrý men onyń tıimdiligin arttyrý úshin Astanadaǵy shtab-pátermen THKM damytý jónindegi úılestirýshi komıtettiń turaqty keńsesin uıymdastyrý usynyldy.
Halyqaralyq transkaspıı kóliktik konsortsıým jumysynyń jospary bekitildi. Bul marshrýt Qytaıdan shyǵyp Qazaqstan, Kaspıı teńizi, Ázerbaıjan, Grýzııa, Túrkııa jáne odan ári Eýropaǵa ótedi.
THKM konteınerlik tasymaldy damytý úshin úlken múmkindikter men áleýetke ıe. Eýrazııalyq qurylyqta saýdanyń ósýine yqpal etedi.
Otyrys barysynda «QTJ» UK» AQ prezıdenti Asqar Mamın biraýyzdan THKM damytý jónindegi úılestirýshi komıtettiń tóraǵasy bolyp qaıta saılandy.
