A. Qurmanǵalıeva Eńbek jáne halyqty áleýmettik qorǵaý mınıstrliginiń jaýapty hatshysy qyzmetine taǵaıyndaldy

ASTANA. 4 aqpan. QazAqparat - Búgin QR Prezıdenti Ákimshiligi basshysynyń orynbasary Ǵabıdolla Ábdirahymov QR Eńbek jáne halyqty áleýmettik qorǵaý mınıstrligi ujymyna jaýapty hatshy qyzmetine jańadan taǵaıyndalǵan Aıda Qurmanǵalıevany tanystyrdy.

Bul týraly Eńbek jáne halyqty áleýmettik qorǵaý vıtse-mınıstri Serik Ahmetov Tvıtterde habarlady.

Ol 1970 jyly dúnıege keldi. Qazaq memlekettik basqarý akademııasyn «Ekonomıkalyq jáne áleýmettik josparlaý» mamandyǵy boıynsha támamdady.

2002 jyly Birikken Vena ınstıtýtynda (Vena, Avstrııa), 2008 jyly Dıýk ýnıversıtetinde (Soltústik Korolına, AQSh), 2009 jyly Lı Kýan ıÝ atyndaǵy Memlekettik saıasat mektebinde (Sıngapýr) bilim aldy.

Óziniń eńbek jolyn QR qarjy mınıstrliginde ekonomıst retinde qyzmet etýden bastady. Ár jyldary basqarma bastyǵy, Qarjy mınıstrliginiń departament dırektorynyń orynbasary, QR Ekonomıka jáne bıýdjettik josparlaý mınıstrliginiń áleýmettik sala shyǵyndaryn josparlaý jáne áleýmettik salany damytý departamentteriniń dırektory boldy.

Bul qyzmetke taǵaıyndalmas buryn A. Qurmanǵalıeva QR densaýlyq saqtaý vıtse-mınıstri boldy.