«A» korpýsynyń qyzmetshilerin qashyqtyqtan oqytýdyń jańa jobasy iske qosyldy

ASTANA. QazAqparat - QR Prezıdenti janyndaǵy Memlekettik basqarý akademııasynda alǵash ret «A» korpýsynyń memlekettik qyzmetshilerin onlaın rejıminde qashyqtyqtan oqytýdyń ınnovatsııalyq jobasy óz jumysyn bastady, dep habarlaıdy akademııanyń baspasóz qyzmetinen.

Akademııa shetelderdiń jetekshi ǵylymı ortalyqtarynyń ınnovatsııalyq tehnologııalaryn negizge alyp, «A» korpýsyn oqytý úshin irgeli is-tájirıbege súıenetin onlaın rejıminde oqytýdyń modýlin qurastyrdy. Soǵan sáıkes,akademııa óziniń qazirgi kommýnıkatsııalyq jabdyqtaryn paıdalana otyryp, «A» korpýsynyń basqarýshylaryna Qazaqstan Respýblıkasyndaǵy strategııalyq josparlaý men bıýdjetteý, memlekettik organdardaǵy kadrlar menedjmenti, basqarýshylyq sheshimderdi ázirleý men qabyldaý pánderin zerdeleý boıynsha ınnovatsııalyq bilim tehnologııalary salasyna enýge múmkindik beredi.

Oqytýdyń sońǵy kezeńinde akademııanyń professor-oqytýshylar quramy kýrstyń tyńdaýshylary úshin basshynyń jeke tıimdiligi boıynsha birqatar trenıngter ótkizýdi josparlap otyr.

«Sondaı-aq oqytý úderisinde praktıkalyq quramdas bóligi oqıtyndar úshin keıster daıyndaý túrinde aıqyndalatyn bolady. Keıstermen jumys «A» korpýsyna alǵash taǵaıyndalǵan memlekettik qyzmetshilerge komandamen jumys isteý, tıimdi basqarýshylyq sheshimderdi qabyldaý, aqparat kózderimen jáne qatań ýaqyt sheńberinde jumys isteı bilý daǵdylaryn kórsetýine múmkindik beredi» delingen baspasóz qyzmeti taratqan habarlamada.