«A» korpýsynyń ákimshilik qyzmetshileri biliktilikterin arttyrýda
ASTANA. 3 qazan. QazAqparat - QR Prezıdenti janyndaǵy Memlekettik basqarý akademııasynda oblystar, Astana men Almaty qalalary ákimderi apparattarynyń basshylary úshin «A» korpýsynyń ákimshilik memlekettik qyzmetshileriniń biliktiligin arttyrý semınary ótýde. 5 qazanǵa deıin jalǵasatyn semınar qorytyndysynda tyńdaýshylarǵa sertıfıkattar tapsyrylady.
Semınardyń maqsaty - tyńdaýshylardyń jobalardy basqarý boıynsha quzyretterin damytý, memlekettik organdardaǵy ishki aýdıttiń negizgi aspektilerimen tanystyrý, kóshbasshylyq daǵdylardy jetildirý, qaqtyǵystaný salasyndaǵy bilimdi keńeıtý, sondaı-aq áleýmettik qaqtyǵystardyń aldyn alý men sheshý.
Semınardyń ashylýynda QR Prezıdentiniń Ákimshiligi basshysynyń orynbasary Ǵabıdolla Ábdirahymov, QR Memlekettik qyzmet isteri agenttiginiń tóraǵasy Álıhan Baımenov, QR Prezıdentiniń janyndaǵy Memlekettik basqarý akademııasynyń rektory Bolatbek Ábdirasylov quttyqtaý sóz sóıledi.
Úsh kúndik semınardyń baǵdarlamasy blok-modýl prıntsıpi boıynsha qurastyrylǵan. Ony ázirleýge Eýropalyq Odaqtyń sarapshylary qatysty.
Semınardyń birinshi kúni «Policy Advisory Group» sarapshylary ınteraktıvti trenıng ótkizdi. Onda jobalardy basqarýdaǵy basty daǵdylar naqty mysaldarmen kórsetildi.
Ekinshi kúni álemdegi jetekshi mamandardyń biri - Shpaıer Akademııasynan doktor Djýlııa Fleısher (GFR) memlekettik organdarda ishki aýdıtti júrgizýdiń ádisnamasy men eýropalyq tájirıbesi týraly aıtyp beredi. Bizdiń elimizde qazirgi ýaqytta osy problema boıynsha normatıvtik quqyqtyq baza ázirlenip jatqanyn atap ótý kerek.
Qorytyndy kúni ENA-nyń tanymal sarapshysy (Frantsııa Ulttyq memlekettik basqarý mektebi) Per Jevar áleýmettik shıelenisterdi basqarýǵa basty nazar aýdara otyryp, kóshbasshylyq boıynsha trenıng ótkizedi, onda áleýmettik shıelenisterdiń aldyn alý men sheshý sharalary qarastyrylatyn bolady.
