«A» korpýsyna úmitkerlerdiń memlekettik tilden synaq tapsyrýy úlken betburys - Á. Báımenov

Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte «A» korpýsynyń kadr rezervine irikteýdiń birinshi satysynyń qorytyndysy týraly baıandaý kezinde QR Memlekettik qyzmet isteri agenttiginiń tóraǵasy Álıhan Báımenov málim etti.

«Tuńǵysh ret basshy laýazymyndaǵy «A» korpýsyna barlyq úmitkerler, onyń ishinde barlyq qala aýdan ákimderi memlekettik tilden synaqtan ótti. Bul úlken jańalyq ári úlken betburystyń bir kórinisi. «A» korpýsyna barlyq úmitkerler memlekettik tildi bilýden «QAZTEST» júıesi boıynsha tapsyrdy», - dedi agenttik basshysy.

Onyń sózine qaraǵanda, «QAZTEST» ókili akademııanyń ǵımaratynda eki zalda testileýden ótkizip, olarǵa akademııanyń qyzmetkerleri baqylaýshy boldy jáne beıne qadaǵalaý sharalary da júrgizildi.

«Olardyń nátıjelerin biz qorytyndylaǵan joqpyz, ıaǵnı osy nátıjelerdi «QAZTEST» ókilderi qorytty. Atap aıtqanda, bul nátıje qazir saraptalý ústinde. Eń uzaq test memlekettik tildi bilýden boldy. Eger zańnamany bilýdi testileý 80 mınýtqa sozylsa, al memlekettik tilge 150 mınýt ýaqyt bólindi»,-dedi Á. Báımenov.

Esterińizge sala keteıik, 15-27 mamyr aralyǵynda «A» korpýsynyń kadr rezervine kandıdattardy testileý júrgizildi. Oǵan qatysqan 1787 kandıdattyń 499-y «A» korpýsynyń qyzmetshileri, 931-i ózge memlekettik qyzmetshiler, 357-si memlekettik qyzmetshi bolyp tabylmaıtyn tulǵalar. Al 64 kandıdat testileýge kelgen joq.

Atap aıtqanda, 1124 (62,9 paıyz) kandıdat shekti mándi eńserip, testileýden tabysty ótti. 663 kandıdat shekti mándi jınaı almady. Endi olar irikteýdiń kelesi kezeńine jiberilmeıdi

Aıta keteıik, testileý barysynda 100 baldy tolyǵymen 15 kandıdat jınaǵan. Testileý baǵdarlamasyna memlekettik qyzmet salasyndaǵy 10 zańdy bilýge arnalǵan suraqtar engizildi.