«A» korpýsyna testileýden ótken kandıdattardyń alǵashqy leginiń 29 paıyzy synnan súrindi
ASTANA. 16 mamyr. QazAqparat - Testileýdiń birinshi kúniniń qorytyndysy boıynsha 146 kandıdattyń 103-i Qazaqstan Respýblıkasynyń zańnamasyn bilýine testileýdi tabysty tapsyrdy. Zańnamany bilýine shekti mánnen 43 kandıdat nemese testileýge qatysýshylardyń jalpy sanynan 29 paıyzy ótpedi. Bul týraly QR Memlekettik qyzmet isteri agenttigi habarlap otyr.
Zańnamany bilýine testileýden ótken kandıdattar jeke jáne basqarýshylyq quzyretterin (ádeptilik, kommýnıkatıvtiligi, básekege baǵdary jáne sapaǵa baǵdaryn) anyqtaý testine jiberildi. Ekinshi kúni kandıdattar logıkalyq verbaldy emes testten (Ravenna kestesi) jáne memlekettik tildi bilýine testileýden (QAZTEST) ótedi.
«A» korpýsynyń kadr rezervine kandıdattardy testileý 2013 jyldyń 27 mamyryna deıin sozylady. Testileý kestesi, normatıvtik-quqyqtyq aktiler tizbesi, sondaı-aq "A" korpýsynyń kadr rezervine irikteý erejesi Agenttiktiń www.kyzmet.gov.kz ınternet-resýrsynda ornalastyrylǵan.
Budan buryn habarlanǵandaı, kandıdattar Qazaqstan Respýblıkasynyń on zańyn bilýine kompıýterlik testileýden ótedi. Bul rette shekti deńgeıdi eńserý úshin kandıdattar árbir zań boıynsha múmkin bolatyn 10 suraqtyń 7-ne durys jaýap berýi qajet.
Esterińizge sala keteıik, «A» korpýsynyń kadr rezervine 2024 kandıdattan, ıaǵnı olardyń arasynda memlekettik qyzmet atqaratyn da memlekettik qyzmet atqarmaıtyn da kandıdattardan qujattar kelip tústi.
