«A» korpýsyna tapsyrǵandardyń ishinde erlerden góri qyz-kelinshekter jaqsy nátıjege qol jetkizdi - G. Ábdiqalyqova
ASTANA. 19 qarasha. QazAqparat - «A» korpýsyna tapsyrǵandardyń ishinde erlerden góri qyz-kelinshekter jaqsy nátıjege qol jetkizdi. Bul týraly búgin S. Seıfýllın atyndaǵy Qazaq agrotehnıkalyq ýnıversıtetinde QR Prezıdenti janyndaǵy Áıelder isi, otbasy jáne demografııalyq saıasat jónindegi Ulttyq komıssııanyń 15 jyldyǵyna oraı ótkizilgen sharada atalmysh Komıssııa tóraıymy Gúlshara Ábdiqalyqova aıtty.
«A» korpýsyna qabyldaý kezinde qujat tapsyrǵandardyń 14 paıyzǵa jýyǵy qyz-kelinshekter boldy. Al synaqtan ótkenderdiń jalpy paıyzyn eseptegende, qyz-kelinshekterdiń úlesi 18-19 paıyzǵa kóterilgen bolyp shyqty. ıAǵnı, «A» korpýsyna irikteý kezinde biliktilik jaǵynan qyzdar jaqsy kórsetkish kórsetti. Barlyǵy derlik testileýden qulamaı, aman-esen ótti. Jigitter jaǵyn ózderińiz de bilesizder, kóbisi qulady, ár túrli jaǵdaılar boldy», - dedi ol.
Sondaı-aq, tóraıymnyń aıtýynsha, bıyldan bastap aýyl ákimderiniń saılaýy boldy. Jalpy respýblıka boıynsha 2450 aýylǵa ákimder saılanyp, onyń ishinde 11 paıyzyn názik jandylar qurady.
«Osy saılaýdan keıin biz Batys Qazaqstan oblysynda jáne Ońtústik Qazaqstan oblysynda barlyq aýyl ákimi bolyp saılanǵan qyz-kelinshekterdi jınap úlken semınar ótkizdik. Sonda bizdiń baıqaǵanymyz, qyzdar óte belsendi ári bilimderi joǵary eken», - dedi G. Ábdiqalyqova.
